Grindavík hafði betur gegn Magna í rokleik

Grindavík lyfti sér upp í 5.sæti Lengjudeildar karla í fótbolta þegar liðið fékk Magna frá Grenivík í heimsókn í dag.

Hvasst var í Grindavík í dag og nýttu heimamenn sér meðvindinn til að skora þrjú mörk í fyrri hálfleik. Oddur Bjarnason gerði tvö mörk og Sigurjón Rúnarsson eitt.

Magnamenn náðu að klóra í bakkann þegar Elías Tamburini setti boltann í eigið net á 85.mínútu en fleiri urðu mörkin ekki og 3-1 sigur Grindavíkur staðreynd.

Magnamenn í vandræðum á botni deildarinnar en þó aðeins þremur stigum frá öruggu sæti þegar fjórum umferðum er ólokið.