Pressa á þeim sem gáfu ekki kost á sér að vera upp á sitt besta gegn Rúmeníu

Atli Viðar Björnsson segir frammistöðu íslenska landsliðsins í fótbolta hafa verið gjörólíka gegn Belgíu í gær miðað við Englandsleikinn á laugardag. Margt jákvætt megi taka úr leikjunum.

„Það er rosalega erfitt að taka þessa tvo leiki saman sem heild, því þeir voru svo ólíkir. Englandsleikurinn var frábær að næstum því öllu leyti en Belgíuleikurinn í gær meiri vonbrigði en hitt. Ef við lítum á þetta jákvæðum augum þá er fullt af ungum leikmönnum að fá tækifæri, menn eru að fá reynslu og það er verið að máta þá inn í hlutverkin, svo ég held að það sé fleira jákvætt í þessu en neikvætt,“ sagði Atli Viðar við Svövu Kristínu Gretarsdóttur í Sportpakkanum. Viðtalið má sjá hér að neðan.

Nú er mánuður í að Ísland leiki við Rúmeníu í undanúrslitum umspilsins um sæti á EM næsta sumar. Atli Viðar segir erfitt að meta stöðuna á íslenska liðinu enda hafi Gylfi Þór Sigurðsson, Jóhann Berg Guðmundsson og Alfreð Finnbogason ekki gefið kost á sér gegn Englandi og Belgíu, félag Arons Einars Gunnarssonar meinaði honum að spila, Ragnar Sigurðsson, Kolbeinn Sigþórsson og Rúnar Már Sigurjónsson voru meiddir, og þeir Kári Árnason, Hannes Þór Halldórsson og Sverrir Ingi Ingason fóru ekki með til Belgíu.

Naumur tími til undirbúnings gegn Rúmenum

„Freyr [Alexandersson, aðstoðarþjálfari] sagði sjálfur í aðdraganda þessara leikja að þeir væru að nota þessa landsleikjatörn til að undirbúa þann leik líka. Þeir fá bara tvo æfingadaga fyrir Rúmeníuleikinn svo þeir eru væntanlega búnir að vera að drilla taktík og spá hvað þeir ætla að gera á móti Rúmeníu, en svo er líka stór spurning hvaða leikmenn við fáum á móti Rúmeníu. Það eru tíu leikmenn sem ekki tóku þátt í gær sem eru allir líklegir til að taka þátt á móti Rúmeníu. Það er atriði sem þarf að komast á hreint, hverja við getum notað. Svo er það yngri mannanna, og annarra sem stimpluðu sig inn núna, að fylla upp í og halda áfram góðri frammistöðu,“ sagði Atli Viðar.

Hann tók undir að gott hefði verið að hafa alla fyrrnefndu leikmennina til staðar í síðustu leikjum:

„Auðvitað hefði það verið best að hafa alla þessa tíu leikmenn alla vikuna og geta undirbúið Rúmeníuleikinn með þessum tveimur leikjum. Þessir þrír sem gáfu ekki kost á sér núna mátu það sem svo að þeir yrðu betur undirbúnir í október með því að vera í sínum félagsliðum núna, svo það er pínulítil pressa á þá að taka að sér hlutverk í sínum liðum og vera eins vel undirbúnir í október og hugsast getur.“

Atli Viðar fór einnig yfir hverjir hefðu stimplað sig vel inn í leikjunum og hverjir hefðu ekki staðið sig nægilega vel:

Hreifst af Jóni Degi og Hólmberti

„Það var margt jákvætt, sérstaklega á laugardaginn. Guðlaugur Victor var frábær á laugardaginn, stimplaði sig inn og styrkti sína stöðu. Ég sé ekki annað en að hann verði í stóru hlutverki á móti Rúmeníu. Ég var hrifinn af Jóni Degi á laugardaginn, mér fannst gaman að sjá Hólmbert í fyrri hálfleik í gær, og þessar sekúndur sem hann fékk á móti Englandi líka. Hann er klárlega að stimpla sig inn í hlutverk í hópnum líka.

Mér fannst Emil Hallfreðsson eiga erfitt uppdráttar eftir að hann kom inn á í gær. Jón Guðni var í vandræðum, það er langt síðan hann hefur spilað. Ari Freyr átti ekki sinn besta leik, einn af okkar reyndari mönnum. Birkir Bjarnason líka. En þetta eru gæjar sem við vitum hvað geta og hvað eiga inni. Það er vonandi að þeir verði á betri stað í sínu formi þegar að Rúmeníuverkefninu kemur í október.

Andri Fannar Baldursson var í byrjunarliði í gær, 18 ára. Var það of stórt skref?

„Þetta var auðvitað risastórt verkefni fyrir hann. Belgía á útivelli er eins erfitt verkefni og verður fyrir íslenska liðið. Á móti kemur að þó hann sé 18 ára hefur hann verið að spila í efstu deild Ítalíu og mér fannst því frábært að hann fengi að máta sig inn á þetta svið, fá dýrmæta reynslu í bankann, og hann mun láta meira að sér kveða í liðinu á næstunni, það er ekki spurning,“ sagði Atli Viðar.