Erlent

Átökin koma sérstaklega niður á börnum

Samúel Karl Ólason skrifar
Nýjustu tölur SÞ segja 948 þúsund manns á flótta og þar af séu rúmlega 80 prósent konur og börn.
Nýjustu tölur SÞ segja 948 þúsund manns á flótta og þar af séu rúmlega 80 prósent konur og börn. Vísir/AP

Um milljón manna hafa flúið undan sókn stjórnarhers Bashar al-Assad, forseta Sýrlands, í Idlib-héraði. Sóknin nýtur stuðnings Rússa, sem hafa verið sakaðir af mannréttindasamtökum um loftárásir á sjúkrahús og skóla. Sameinuðu þjóðirnar hafa ítrekað lýst yfir áhyggjum vegna stöðunni og segja hana sjaldan hafa verið verri í átökum í Sýrlandi sem hafa nú staðið yfir í níu ár.

Nýjustu tölur SÞ segja 948 þúsund manns á flótta og þar af séu rúmlega 80 prósent konur og börn.

Mannréttindastofnun Sameinuðu þjóðanna segir loftárásir hafa verið gerðar á skóla og sjúkrahús þar sem flóttafólk hefur haldið til. Minnst 21 almennur borgari er sagður hafa fallið á síðustu dögum.

Auk þeirrar milljónar sem þegar hafa flúið heimili sín eru tvær milljónir til viðbótar í Idlib. Margir þeirra höfðu flúið til Idlib vegna átaka annars staðar í landinu og gætu þau þurft að flýja á nýjan leik.

Hluti vandans er þó að þau geta hvergi flúið og ástandið gæti versnað til muna.

Fólkið hefur flúið í átt til Tyrklands en þar eru fyrir um 3,7 milljónir flóttamanna frá Tyrklandi. Yfirvöld þar segjast ekki geta tekið við fleiri flóttamönnum og hafa hótað því að gera innrás á svæðið til að stöðva sókn stjórnarhersins.

Sjá einnig: Hótar því að ráðast enn eina ferðina inn í Sýrland

Recep Tayyip Erdogan, forseti Tyrklands, ítrekaði hótun sína í dag og sagði að innrás Tyrklands myndi hefjast í vikunni. Tyrkir og Rússar skrifuðu árið 2018 undir samkomulag um að gera nokkurs konar friðarsvæði í Idlib. Báðar fylkingar settu upp eftirlitsstöðvar í héraðinu en nú saka bæði Tyrkir og Rússar hvora aðra um að brjóta gegn samkomulaginu.

Undanfarin ár hafa vígamenn hliðhollir al-Qaeda nýtt sér óreiðuna í Idlib og stjórna þeir nú héraðinu. Að einhverju leyti hafa þeir gert það með stuðningi Tyrkja.

Flóttafólkið í Idlib sefur í tjöldum eða jafnvel undir berum himni og þá í miklum kulda. Blaðamenn New York Times hafa staðfest að minnst níu ungabörn hafa dáið úr kulda á undanförnum vikum en veturinn hefur ekki þótt svona slæmur í mörg ár.

Fólkið brennir allt sem þau geta til að halda á sér hita að nóttu til. Þegar viðurinn klárast þá brennir fólkið rusl og jafnvel föt. Meðlimir einnar fjölskyldu kveiktu eld inn í tjaldi þeirra fyrr í mánuðinum með þeim afleiðingum að tjaldið brann. Tvö börn dóu í eldinum.

Washington Post hefur eftir meðlimum mannréttindasamtakanna Syrian American Medical Society að minnst tíu skólar í héraðinu hafi orðið fyrir árásum á þriðjudaginn.

„Manni finnst eins og dauðinn umkringi mann. Alls staðar,“ sagði Ikrem, læknir sem bað um að fullt nafn hennar yrði ekki birt því Assad-liðar myndu fljótt ná tökum á svæðinu. „Það er enginn matur. Það eru engin hús.“

Hún sagði tvö nýfædd börn sem hafi fæðst á sjúkrahúsi hennar hafa dáið úr kulda á undanförnum vikum.

Blaðamenn Washington Post ræddu einnig við fjölskyldur sem hafa leitað skjóls í hellum í Idlib. Þau hafa enga leið til að hita hellana og flestir meðlimir fjölskyldnanna eru nú með sýkingar vegna rakans í hellunum. Átta fjölskyldur búa í hellunum tveimur. Þar eru engin klósett og lítill matur.

Tengd skjöl


Tengdar fréttir

Hótar því að ráðast enn eina ferðina inn í Sýrland

Recep Tayyip Erdogan, forseti Tyrklands, segir viðræður við Rússa um átökin í Idlib-héraði í Sýrlandi hafa verið vonbrigði. Þær hafi jafnvel verið móðgandi og einungis tímaspursmál sé hvenær Tyrkir grípa til aðgerða í héraðinu.

Ástandið aldrei verið verra í Sýrlandi, segir UNICEF

Rúmlega hálf milljón barna í norðvesturhluta Sýrlands hefur neyðst til að flýja heimili sín frá 1. desember síðastliðnum. Tugþúsundir barna og fjölskyldur þeirra búa nú ýmist í tjöldum eða undir berum himni.

Rúmlega 400 milljónir barna búa á átakasvæðum

Stríðs- og átakasvæði verða sífellt hættulegri fyrir börn, segir í árlegri skýrslu sem Barnaheill - Save the Children sendi frá sér á dögunum. Samkvæmt skýrslunni hefur ofbeldi gegn börnum á átakasvæðum aldrei verið meira frá því skráningar hófust.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.