Viðskipti innlent

Fiskvinnslan sem átti að loka er núna sextíu manna vinnustaður

Kristján Már Unnarsson skrifar
Jóna Kristín Sigurðardóttir, frá Karlsstöðum í Berufirði, starfar núna sem gæðamatsmaður í Búlandstindi.
Jóna Kristín Sigurðardóttir, frá Karlsstöðum í Berufirði, starfar núna sem gæðamatsmaður í Búlandstindi. Stöð 2/Egill Aðalsteinsson.

Tugir manna á Djúpavogi stóðu frammi fyrir atvinnumissi og brottflutningi þegar þáverandi eigandi Búlandstinds, stærsta atvinnufyrirtækisins, tilkynnti vorið 2014 að fiskvinnslu yrði hætt og fimmtíu störf flutt til Grindavíkur. Saga endurreisnarinnar og hvernig nýjum stoðum var hleypt undir samfélagið á sunnanverðum Austfjörðum er rakin í þættinum Um land allt á Stöð 2.

„Við erum bara í góðum málum í dag. Þökk sé eldislaxinum. Við hefðum ekki neitt ef við hefðum ekki laxeldið. Það er bara þannig. Þetta er lífæðin okkar hérna,“ segir Jóna Kristín Sigurðardóttir, gæðamatsmaður í Búlandstindi, sem er meðal þeirra sem rætt er við. Jóna Kristín er frá Karlsstöðum í Berufirði en hefur búið á Djúpavogi í þrjátíu ár. 

Francisco Vides er í hópi margra erlendra starfsmanna en hann flutti til Íslands alla leið frá Mið-Ameríku, frá Hondúras. Hann talar íslensku og segist ekki vera á leið til baka, fjölskyldunni líði vel á Djúpavogi, hann sé að verða Íslendingur.

Francisco Gomez Vides, starfsmaður Búlandstinds, flutti frá Hondúras en býr á Djúpavogi með fjölskyldu sinni.Stöð 2/Egill Aðalsteinsson.

Búlandstindur er núna í jafnri eigu þriggja aðila, tveggja laxeldisfyrirtækja; Fiskeldis Austfjarða og Laxa fiskeldis, og Ósness, sem er í hefðbundnum fiskveiðum. Slátrun og vinnsla á eldislaxi er nýr grunnur starfseminnar. Jafnframt sinnir Búlandstindur hefðbundinni vinnslu á þorski og öðrum botnfiski.

Elís Hlynur Grétarsson, framkvæmdastjóri Búlandstinds, lýsir því markmiði fyrirtækisins að verða sláturhús fyrir allt fiskeldi á Austurlandi. Árið 2019 fóru um tvöþúsund tonn af veiddum bolfiski í gegnum húsið en 7-8 þúsund tonn af eldislaxi og gerir hann ráð fyrir að laxinn tvöfaldist á þessu ári.

Elís Grétarsson, framkvæmdastjóri Búlandstinds ehf.Stöð 2/Egill Aðalsteinsson.

Umsvifin í höfninni hafa líka breyst. Komin er ný tegund skipa, sem sérhæfð eru til að þjóna fiskeldinu, eins og brunnbátur á stærð við togara, sem sækir laxinn í kvíarnar. Það er liðin tíð á Djúpavogi að togarinn komi með mesta aflann til vinnslu í landi, núna er það brunnbáturinn. 

Þátturinn er sá fyrri af tveimur frá Djúpavogi og verður endursýndur á Stöð 2 á laugardag kl. 15.45. Seinni þátturinn verður svo frumsýndur næstkomandi mánudag kl. 19.10.

Hér má sjá kafla úr fyrri þættinum:


Tengdar fréttir

Íbúar Djúpavogs í stríð við stjórnvöld: "Við neitum að gefast upp“

Sveitastjórn Djúpavogs fer óhefðbundnar leiðir til þess að mótmæla áhrifum fiskveiðistjórnunarkerfisins á sveitarfélagið. Tveir kvikmyndagerðarmenn, sem ólust þar upp, hafa nú gert áhrifaríkt myndband sem sýnir samstöðu íbúa Djúpavogs í baráttunni gegn stjórnvöldum.

Bjartsýni á Djúpavogi með endurreisn Búlandstinds

Viðsnúningur hefur orðið í atvinnumálum á Djúpavogi, íbúum fjölgar og þar ríkir bjartsýni. Störfin í stærsta atvinnufyrirtækinu eru núna orðin fleiri en var fyrir fimm árum þegar tilkynnt var um lokun þess.






Fleiri fréttir

Sjá meira


×