Innlent

Ekkert sýni reynst jákvætt

Andri Eysteinsson og Nadine Guðrún Yaghi skrifa
Víðir Reynisson, yfirlögregluþjónn hjá embætti Ríkislögreglustjóra.
Víðir Reynisson, yfirlögregluþjónn hjá embætti Ríkislögreglustjóra. Vísir/Vilhelm

Ekkert þeirra sýna sem rannsökuð hafa verið eftir að íslenskur karlmaður greindist með kórónuveiruna í gær hefur reynst jákvætt fyrir veirunni. Þetta kemur fram í tilkynningu frá Almannavarnardeild Ríkislögreglustjóra.

„Engin fleiri staðfest tilvik af vírusnum eru gríðarlega góðar fréttir fyrir okkur. Það voru tekin sýni úr fólki sem hefur verið í miklum samskiptum við þann sem var með jákvætt sýni,“ segir Víðir Reynisson yfirlögregluþjónn hjá Ríkislögreglustjóra í samtali við fréttastofu.

Neikvæð svör við prófunum á sýnum þýðir þó ekki endilega að fólk sleppi við að sitja í sóttkví að sögn Víðis. „Við viljum halda fólki áfram í sóttkví í fjórtán daga þrátt fyrir að sýnin hafi reynst neikvæð.“ 

Fólk sé því enn í sóttkví og hefur heilsugæslan verið í sambandi við aðila í sóttkví. Eftir að upp komst um smitið hófst umfangsmikil vinna af hálfu sóttvarnalæknis, ríkislögreglustjóra og lögreglunnar á höfuðborgarsvæðinu að rekja mögulegar smitleiðir.

Sú vinna leiddi til þess að 49 manns var ráðlagt að fara í sóttkví. Í dag eru því 81 einstaklingur í sóttkví á landinu öllu.

 

Veróna er í ítalska héraðinu Venetó. Grafík

Nú síðdegis er von á leiguflugvél frá Veróna. Borg á Ítalíu sem er innan áhættusvæðis en um er að ræða eina beina flugið frá slíku svæði. Víðir segir viðbúnaðinn vera nokkurn fyrir komu vélarinnar. Um borð eru 180 Íslendingar. 

„Þegar vélin lendir fá allir útprentaðar upplýsingar, við erum með lögreglumenn og heilbrigðisstarfsmenn sem munu taka á móti farþegunum. Farþegarnir fara í rútu úr vélinni og munu fara inn í Leifsstöð í gegnum sérinngang svo þau þurfi ekki að vera innan um annað fólk,“ segir Víðir.

Farþegarnir frá Veróna þurfa hins vegar að ganga í gegnum töskusal flugstöðvarinnar líkt og aðrir en Víðir segir enga ástæðu til að óttast smit í salnum.

„Þau hafa fengið leiðbeiningar um að forðast annað fólk sem mest en það að vera í töskusalnum með smituðum einstakling þýðir ekki að allir þar inni muni smitast.“

Þeir farþegar sem dvalið hafa á hættusvæðunum fjórum, Langbarðalandi, Venetó, Emilía-Rómanja og Fjallalandi, þar sem mest hætta er á smiti fara í fjórtán daga sóttkví og hafi fengið fyrirmæli um að forðast annað fólk eftir bestu getu á leið sinni heim.

Höldum umræðunni skynsamlegri

„Allir sem hafa verið nálægt honum, og hafa verið prófuð, hafa ekki reynst smituð. Langsótt tengsl eru ekki líkleg til að hafa smitað. Auðvitað viljum við að fólk leiti sér upplýsinga en við verðum að halda umræðunni skynsamlegri. Leitum í fjölmiðlana sem eru að fjalla faglega um málin en ef þú ert í vafa þá hringir þú í 1700,“ sagði Víðir Reynisson yfirlögregluþjónn hjá Ríkislögreglustjóra.

Í tilkynningu frá almannavarnadeild og sóttvarnalæknir lýsa yfir áhyggjum vegna yfirstandandi og yfirvofandi verkföllum. Þetta eru aðgerðir sem geta haft áhrif á viðkvæmustu hópa samfélagsins eins og fólk á hjúkrunarheimilum. Þá getur takmörkuð sorphirða jafnframt dregið úr áhrifamætti sóttvarnaaðgerða.


Tengdar fréttir

Hóteli á Rauðarárstíg breytt í sóttkví

Ákveðið hefur verið að nýta hótel á Rauðarárstíg sem sóttkví fyrir þau sem mögulega smituð eru af kórónuveirunni. Gestum hótelsins var tilkynnt þetta í morgun og voru þeir fluttir á annað hótel í nágrenninu. Forstjóri Sjúkratrygginga segir ekkert smit hafa komið upp, aðeins sé um varúðarúrræði að ræða.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.