Birna Berg með tvö mörk í naumum sigri

Birna Berg Haraldsdóttir, landslliðskona í handbolta, skoraði tvö mörk í þriggja marka sigri Neckarsulmer Sport-Union á HSG Bad Wildungen Vipers í þýsku úrvalsdeildinni í handbolta í dag. Lokatölur 26-23.

Heimastúlkur í Neckarsulmer voru með yfirhöndina nær allan leikinn og leiddu með tveimur mörkum í hálfleik, staðan þá 13-11. Í síðari hálfleik spilaðist leikurinn svipað og á endanum unnu Birna Berg og stöllur hennar þriggja marka sigur.

Var þetta aðeins fjórði sigur Neckarsulmer í deildinni það sem af er vetri en liðið hefur tapað níu af 13 leikjum sínum. Liðið er sem stendur í 10. sæti með átta stig.