Borgarráð fjallaði um styttri opnunartíma leikskóla

Tillaga um að framkvæmt verði ítarlegt jafnréttismat, í tengslum við áform borgarinnar um að stytta opnunartíma leikskóla, var afgreidd á fundi borgarráðs í dag. Áformin, sem skiptar skoðanir eru uppi um, byggja á tillögum sem settar eru fram í áfangaskýrslu stýrihóps um umbætur og skipulag leikskólastarfs í Reykjavík en fulltrúar stýrihópsins mætti á fund borgarráðs í dag.

„Við áttum bara mjög gott samtal við hópinn. Svo lögum við fram þessa tillögu um faglegt jafnréttismat og það verði farið í að tala við hagaðila í þessum málum, þá einkum félög foreldra,“ segir Þórdís Lóa Þórhallsdóttir, formaður borgarráðs, í samtali við fréttastofu.

Sjá einnig: Vilja framkvæma jafnréttismat áður en tillaga um styttri leikskóladag verður samþykkt

Nú sé fyrir höndum heilmikil vinna sem raunar sé þegar byrjuð. Tillagan um að leikskólar borgarinnar loki í síðasta lagi klukkan 16:30 í stað 17:00 var samþykkt af skóla- og frístundaráði í síðustu viku, en samkvæmt henni var miðað við að breytingarnar tækju gildi þann 1. apríl. Þórdís Lóa segir að framkvæmd jafnréttismatsins muni sennilega taka einhverjar vikur og því afar líklegt að breytingarnar taki gildi seinna en lagt var upp með í fyrstu.

Langflestir giftir eða í sambúð

Í kvöldfréttum Stöðvar 2 í gærkvöldi kom fram að langstæri hluti þeirra foreldra sem greiða fyrir vistunartíma fyrir börn sín lengur en til 16:30 séu giftir eða í sambúð. Hátt í 20% þeirra foreldra sem greiða fyrir leikskólatíma í Reykjavík lengur en til hálf fimm á daginn eru einstæðir foreldrar. Um 73% þeirra eru hjón eða sambúðarfólk.

Fram hefur komið að foreldrar ríflega 900 barna séu með dvalarsamning sem líkur eftir klukkan 16:30. Af þeim eru foreldrar hátt í 670 barna í sambúð, eða um 73%. Foreldrar rétt um 180 barna eru einstæðir eða 19,8%. 28 þessara barna eiga foreldra sem eru á örorku en alls um 7% þessara barna eiga foreldra sem eru á örorku, sem vinna sjálfir á leikskóla eða sem eru báðir í námi.

„Við höfum gögn sem benda til þess að stærsti hópurinn sem að kaupir tímann eru giftir og fólk í sambúð og meira en helmingur þeirra er ekki að nota tímann en það kunna að vera hópar þarna sem lenda í meiri vandræðum og við viljum eiga þau samtöl með góðu samráði við foreldra úti í hverjum leikskóla og kortleggja þetta á næstu dögum og vikum,“ segir Skúli Helgason, formaður skóla- og frístundaráðs.

Þess vegna verði ráðist í ítarlegt jafnréttismat áður en málið verður samþykkt í borgarráði, en borgarráð fjallaði um málið á fundi sínum í dag þar sem samþykkt var tillaga um að ráðist verði í þetta jafnréttismat.

„Við erum ekkert að bakka með þetta, alls ekki. En við erum að fá gleggri mynd af stöðunni og betri upplýsingar þannig að við séum með fastara land undir fótum varðandi afleiðingarnar,“ segir Skúli, spurður hvers vegna jafnréttismatið hafi ekki verið framkvæmt fyrr og hvort borgin sé með þessu að draga í land með áformin.

Spurður hvort áformunum verði haldið til streitu, óháð því hvað kemur út úr jafnréttismatinu, svarar Skúli á þá leið að enn standi til að gera breytingar. „Við munum leggja til að það verði gerðar breytingar en við munum hlusta á foreldra og taka mið af því hvernig breytingarnar koma við þann hóp. Og eins og ég nefndi áðan þá koma vel til greina einhverjar mótvægisaðgerðir þannig að allir geti unað glaðir við sitt,“ segir Skúli.