Innlent

Aldrei upplifað annað eins „kjálkabrot“

Kristín Ólafsdóttir og Birgir Olgeirsson skrifa
Helga Möller, söngkona og flugfreyja, hefur starfað hjá Icelandair í rúma fjóra áratugi.
Helga Möller, söngkona og flugfreyja, hefur starfað hjá Icelandair í rúma fjóra áratugi. Skjáskot

Flugfreyjur sem voru viðstaddar fund Flugfreyjufélags Íslands, þar sem nýr kjarasamningur félagsins við Icelandair var kynntur, segja stéttina í sárum eftir að Icelandair ákvað að slíta kjaraviðræðum á föstudag. Þrátt fyrir að flugfreyjur séu í áfalli gera þær þó ráð fyrir að nýi samningurinn verði samþykktur.

Nýi kjarasamningurinn var undirritaður aðfaranótt sunnudags. Hann var kynntur félagsmönnum FFÍ á fjölmennum fundi á Hilton Nordica-hótelinu á Suðurlandsbraut í hádeginu. Til stendur að atkvæðagreiðsa um samninginn hefjist á miðvikudag og standi til og með mánudeginum 27. júlí.

Átti von á þessum endahnút

Fréttamaður ræddi við nokkrar flugfreyjur eftir fundinn á Hilton í dag. Sigrún Birna Norðfjörð hefur starfað hjá Icelandair í 24 ár. Hún telur að nauðsynlegt sé að samþykkja samninginn.

„Svo við höldum stéttarfélaginu á lífi,“ segir Sigrún.

Þá segir hún að ákvörðun Icelandair á föstudag um að slíta viðræðum við FFÍ svíði enn – og muni svíða lengi áfram. „Þar tala ég fyrir hönd allra félagsmanna.“

Sigrún Birna Norðfjörð.SKjáskot

Áttirðu von á því að upplifa einhvern tímann svona tíma?

„Satt að segja, já, átti ég von á því að þetta myndi verða endahnúturinn á þessu leiðindaferli sem búið er að vera í gangi.“

Að Icelandair myndi hóta að leita annað?

„Já.“

Eins og í góðu hjónabandi

Sigríður Amalía Þórðardóttir flugfreyja telur nýja samninginn ágætan, miðað við aðstæður.

„Og þá miðað við aðstæður í þjóðfélaginu og heiminum öllum. Ég held að við sem hópur, flugfreyjur og flugþjónar hjá Icelandair, gerum okkur grein fyrir hvernig staðan er og við viljum að félagið okkar lifi áfram. Þannig að já, ég ætla að vera bjartsýn.“

Sigríður Amalía Þórðardóttir.Skjáskot

Hvernig stendur þessi tilfinning eftir varðandi framkomu Icelandair á föstudaginn?

„Eins og í öllum góðum hjónaböndum þá þurfum við að rífast. Og svo vonandi förum við sátt að sofa. Og ég trúi því að nákvæmlega sama muni gerast hér,“ segir Sigríður.

Stétt í sárum

Rósa Sturludóttir flugfreyja segir að sér lítist ekki alltof vel á nýja samninginn. „En aðstæðurnar sem við fengum núna, mér verður að lítast vel á hann. Stemningin er þannig í hópnum, held ég.“

Þá segir hún, líkt og starfssystur sínar hér fyrir ofan, að ákvörðun Icelandair hafi verið stéttinni þungbær.

„Við erum stétt í sárum. En við erum sterk og við höldum áfram og samstaðan er gífurlega mikil. Það er engan bilbug á okkur að finna.“

Rósa Sturludóttir.Skjáskot

„Þetta er engu líkt“

Helga Möller, söngkona og flugfreyja, segir að sér lítist ágætlega á samninginn. Innt eftir því hvort hún telji að flugfreyjur séu reiðubúnar að samþykkja hann spyr hún hvort þær hafi nokkuð val.

„Það er verið að vega að stéttarfélaginu okkar, allhressilega. Það er bara spurning hvernig það fer ef við segjum ekki já við þessum samningi. Ég ætla ekkert að segja hvað ég geri en við erum öll í áfalli eftir þetta. Eftir þessa útreið sem við höfum fengið undanfarna daga. Þetta er spurning um að þurfa áfallahjálp eftir svona,“ segir Helga.

„Þarna standa starfsmenn Icelandair sem eru meira eða minna búnir að vinna hjá þessu fyrirtæki allt sitt líf eins og ég, það eru 43 ár síðan ég byrjaði að fljúga. Ég hef nú upplifað marga erfiðleika hjá fyrirtækinu en þetta gengur út yfir allt. Þetta er engu líkt. Þarna er verið, að ég held, að brjóta lög.“

Heldurðu að flugfreyjur muni hverfa til annarra starfa eða heldurðu að þær vilji vera áfram?

„Við elskum starfið okkar og okkur þykir öllum sérstaklega vænt um Icelandair. Og viljum náttúrulega fyrst og fremst að það fyrirtæki haldi velli. En það er erfitt þegar er komið svona fram við mann. Ég get ekki sagt til um þetta en einhverjir eiga eftir að hætta, alveg örugglega, og hinir halda áfram. Svo „settlast“ þetta vonandi með tímanum. En þetta er kjaftshögg, og rúmlega það. Þetta er kjálkabrot,“ segir Helga.


Tengdar fréttir

Nýr kjarasamningur kynntur fyrir flugfreyjum

Nýundirritaður kjarasamningur Icelandair og Flugfreyjufélags Íslands (FFÍ) verður kynntur félagsmönnum FFÍ á fundi sem boðað var til nú klukkan 11.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×