Þórhallur „miðill“ í 18 mánaða fangelsi fyrir kynferðisbrot

Landsréttur staðfesti í dag átján mánaða fangelsisdóm yfir Þórhalli Guðmundssyni vegna kynferðisbrots gegn karlmanni sem kom til hans í heilunarmeðferð fyrir tíu árum. Maðurinn var rúmlega tvítugur þegar brotið átti sér stað. Þórhallur neitaði allri sök í málinu en tekið var tillit til hversu langan tíma málið dróst þegar refsing hans var ákvörðuð.

Atvikið sem Þórhallur, sem hefur verið nefndur „miðill“ í fjölmiðlum í gegnum tíðina, var upphaflega sakfelldur fyrir í Héraðsdómi Reykjavíkur átti sér stað í september árið 2010. Brotaþolinn lagði ekki fram kæru fyrr en í mars árið 2016. 

Hann sakaði Þórhall um að hafa fróað honum án samþykkis hans þegar hann lá nakinn á nuddbekk. Þórhallur var jafnframt sakfelldur fyrir að beita þolandann ólögmætri nauðung og misnotað þannig traust sem brotaþoli bar til hans sem heilara.

Í dómnum kemur fram að Þórhallur hafi staðfastlega neitað sök. Framburður hans var hins vegar talinn óstöðugur um mikilsverð atriði en brotaþolans stöðugur og trúverðugur.

Við ákvörðun refsingar Þórhalls var litið til þess að hann hefði ekki áður gerst sekur um refsivert brot og að rúmlega fjögur ár væru liðin frá því að ákæra á hendur honum var gefin út. Refsing hans var því ákveðin átján mánaða fangelsi og honum jafnframt gert að greiða fórnarlambinu 800.000 krónur í miskabætur.

Fréttin hefur verið uppfærð.