Stöðvaði fimm­tán ára öku­mann sem hafði boðið fé­lögunum á rúntinn

Lögreglan á Suðurnesjum stöðvaði í nótt fimmtán ára ökumann sem hafði boðið tveimur félögum sínum á rúntinn.

Í tilkynningu frá lögreglu segir að rætt hafi verið við foreldra drengjanna og málið tilkynnt til barnaverndarnefndar.

Í tilkynningunni segir ennfremur að allmargir ökumenn hafi verið staðnir að hraðakstri í umdæmi lögreglunnar á Suðurnesjum á síðustu dögum.

„Sá sem hraðast ók mældist á 139 km hraða þar sem hámarkshraði er 90 km á klukkustund. Hann var jafnframt grunaður um ölvunarakstur og var því handtekinn og færður á lögreglustöð.

Höfð voru afskipti af níu ökumönnum sem óku á negldum dekkjum og voru tveir þeirra án ökuréttinda. Þrír óku með filmur í fremri hliðarrúðum bifreiða sinna og þurfa þeir að færa þær til skoðunar.

Loks voru höfð afskipti af ökumann sem var með tvö börn í aftursæti bifreiðar sinnar, annað í barnabílstól en hvorugt þeirra í belti. Tveir ökumenn óku svo á ljósastaura og var annar þeirra grunaður um ölvunarakstur,“ segir í tilkynningunni.