Körfubolti

„Það er bara hægt að klúðra þessu“

Sindri Sverrisson skrifar
Darri Freyr Atlason er nýr þjálfari karlaliðs KR í körfubolta.
Darri Freyr Atlason er nýr þjálfari karlaliðs KR í körfubolta. MYND/STÖÐ 2 SPORT

„Þetta er þannig að það er bara hægt að klúðra þessu, og ég átta mig alveg á þeirri aðstöðu,“ segir Darri Freyr Atlason, nýráðinn þjálfari Íslandsmeistara KR í körfubolta karla.

KR hefur unnið sex síðustu Íslandsmeistaratitla sem í boði hafa verið, og tvo bikarmeistaratitla á þeim tíma, en enginn Íslandsmeistaratitill var í boði í vor þar sem úrslitakeppnin var blásin af vegna kórónuveirufaraldursins. Ljóst er að Darra, sem vann allt sem hægt er að vinna sem þjálfari kvennaliðs Vals í fyrra og gerði liðið að deildarmeistara í ár, bíður verðugt verkefni að viðhalda árangrinum:

„Leiðin liggur eiginlega bara niður á við, því það er ekki hægt að komast neitt ofar,“ segir Darri við Sportið í dag, en viðtalið má sjá hér að neðan. „En ég velti þessum hlutum í raun ekkert fyrir mér. Ég er að gera þetta út af því að ég fæ tækifæri til að vinna með strákum sem ég ólst upp með, strákum sem ég ber gríðarlega virðingu fyrir, klúbbinn KR sem er með langstærsta liðið á Íslandi, og það eru þessir hlutir sem að munu fylla mig af lífsgleði og ánægju með þetta starf. Vonandi leiðir það til þess að við getum haldið áfram þeirri velgengni sem hefur varað hingað til,“ segir Darri.

Brotthvarf Inga Þórs Steinþórssonar úr þjálfarastarfinu hjá KR kom flestum á óvart og Böðvar Guðjónsson, formaður körfuknattleiksdeildar KR, hefur beðist afsökunar á því hvernig staðið var að þessum málum.

„Ég hef í rauninni ekkert um það að segja. Það var bara verið að ráða mig í vinnu og ég hef ekkert slæmt um Inga að segja. Hann þjálfaði mig meira að segja hérna í 9. flokki held ég. Þetta er bara svona og ég er viss um að við getum byrjað á núllpunkti þegar ég tek við, og haldið áfram. KR-ingum líður bara ágætlega þegar þeir eru á milli tannanna á fólki, hvort sem það er út af góðu eða illu,“ segir Darri.

Á gott og hreinskiptið vinasamband við þá sem taka við kyndlinum

Darri vonast til þess að halda elstu og reyndustu leikmönnum KR í leikmannahópnum, köppum á borð við Jón Arnór Stefánsson og Helga Má Magnússon, sem hafa verið talsvert lengur að en þjálfarinn ungi. Hann er þó hvergi banginn við að stýra slíkum kanónum:

„Ég er ekki að fara að kenna þeim að taka sniðskot með vinstri. Ég er að fara að setja einhverja skýra sýn og skýr hlutverk, og þora að taka erfið samtöl og þess konar hluti, sem ég lít miklu frekar á sem mitt hlutverk. Það er líka held ég það sem að ég er bestur í sem þjálfari, frekar en þessi smáatriði. Ég hef því fulla trú á því að þessi hópur henti mér sömuleiðis vel, þetta séu þroskaðir einstaklingar sem hægt er að taka valdeflandi samtal við,“ segir Darri, sem sömuleiðis mun þjálfa vini sína, Matthías Orra Sigurðarson og Kristófer Acox, og segir að það verði ekki vandamál.

„Það eru kynslóðaskipti í liðinu að eiga sér stað. Kyndillinn er að fara frá ´82-árgangnum og í hendurnar á Matta og Kristófer fram á við. Þeir munu þurfa að axla mikla ábyrgð, og Kristófer sem búinn er að vera hérna lengi að axla meiri ábyrgð en hann hefur gert áður. Kastljósið er á þeim núna. Ég held að þeir skilji að gott samstarf við þjálfarann sé lykilatriði í því að þeir komi sem best út úr þessu líka. Þetta eru skýrir strákar og við eigum gott, hreinskiptið vinasamband sem mun henta vel í þessar aðstæður held ég.“

Klippa: Sportið í dag - Darri um nýja starfið sem þjálfari KR

Sportið í dag er á dagskrá á Stöð 2 Sport alla virka daga klukkan 15.00. Upptökur af fyrri þáttum má nálgast á sjónvarpsvef Stöðvar 2. Stöð 2 Sport er hluti af Sportpakkanum.


Tengdar fréttir

Darri Freyr og Francisco Garcia taka við KR-liðunum

Darri Freyr Atlason og Spánverjinn Francisco Garcia verða þjálfarar meistaraflokka KR í Domino´s deildum karla og kvenna í körfubolta á næsta tímabili. Brynjar Þór Björnsson skrifaði undir tvo samninga.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.