Innlent

Frið­lýsir elsta hluta skóla­bygginga Bif­rastar

Atli Ísleifsson skrifar
Vilhjálmur Egilsson, Margrét Jónsdóttir Njarðvík, Lilja Alfreðsdóttir mennta- og menningarmálaráðherra og Reynir Ingibjartsson.
Vilhjálmur Egilsson, Margrét Jónsdóttir Njarðvík, Lilja Alfreðsdóttir mennta- og menningarmálaráðherra og Reynir Ingibjartsson. stjórnarráð

Lilja Alfreðsdóttir, mennta- og menningarmálaráðherra hefur ákveðið að friðlýsa elsta hluta skólabygginga Samvinnuskólans á Bifröst í Borgarfirði. Er það gert að fenginni tillögu Minjastofnunar Íslands.

Í tilkynningu frá ráðuneytinu segir að tilkynnt hafi verið um friðlýsingu þessa í heimsókn ráðherra á Bifröst í gær.

„Friðlýsingin tekur til ytra borðs samkomuhúss frá 1950, veggfastra innréttinga í samkomusal og setustofu samkomuhúss, ytra borðs tengigangs milli samkomuhúss og gistiálmu og veggmyndar á tengigangi eftir Hörð Ágústsson listmálara,“ segir í tilkynningunni.

Haft er eftir Lilju að samkomuhúsið sé mikilvægt og vel varðveitt dæmi um höfundaverk Sigvalda Thordarson og samstarfsmanna hans, Gísla Halldórssonar og Kjartans Sigurðarsonar, frá upphafsárum þeirra starfsferils. „Ekki síst á það við innréttingar og búnað í samkomusal og setustofu, sem varðveist hefur í nær upprunalegri mynd allt til dagsins í dag,“ segir ráðherra.

Samkomuhúsið var elsta byggingin á Bifröst sem þá var samkomu- og veitingastaður í eigu Sambands íslenskra Samvinnufélaga. Samvinnuskólinn flutti svo þangað í land Hreðavatns í Norðurárdal árið 1955.

„Skólinn hafði þá áður verið til húsa á Sölvhólsgötu í Reykjavík þar sem nú eru skrifstofur mennta- og menningarmálaráðuneytisins. Þegar Samvinnuskólinn tók við samkomuhúsinu var svo reist við það viðbygging með tengigangi, þrílyft heimavistarálma, teiknuð af Skúla H. Norðdahl. Saman mynda húsin tvö fallega og samræmda heild sem hefur einkennt ásýnd Bifrastar og verið táknmynd þeirra skólastofnana sem þar hafa starfað,“ segir í tilkynningunni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.