Öxull brotnaði af sömu þotu

Þotan sem missti eitt hjóla sinna við flugtak frá Keflavík á föstudag hefur áður orðið fyrir skakkaföllum. Þann 28. júní 2001 brotnaði öxull undan hægra hjólastellinu að aftan þar sem þotan stóð við flugstöðina í Kastrup.

Atvikið varð rétt áður en aka átti þotunni með 190 manns um borð út á braut til flugtaks. Rannsóknarnefnd flugslysa í Danmörku komst að þeirri niðurstöðu að öxullinn hefði brotnað vegna tæringar í málmhólki. Samkvæmt upplýsingum frá Icelandair var í kjölfarið farið ítarlega yfir hjólabúnað annarra véla félagsins. Hjólið sem datt af þotunni á föstudag var á vinstra hjólastellinu. - gar