Maður handtekinn fyrir að káfa á fjölda kvenna

Það var svo sannarlega erilsamt hjá lögreglunni á höfuðborgarsvæðinu í nótt, aðfaranótt sunnudags. Eftir því sem fram kemur í dagbókarfærslum lögreglunnar þurfti hún að sinna á sjötta tug útkalla í nótt sem flest tengdust ölvun.

Laust eftir miðnætti í nótt kom stúlka á lögreglustöðina við Hverfisgötu sem tilkynnti að hún hafði verið rænd af stúlku skömmu áður. Sú hafi verið vopnuð eggvopni. Stúlkan sem kom á stöðina sagðist hafa verið að bíða eftir bróður sínum sem var að klára vinnu á veitingastað í vesturbæ Reykjavíkur. Málið er til rannsóknar.

Þá réðst kona á dyravörð á skemmtistað í miðbænum á öðrum tímanum í nótt. Að sögn lögreglunnar brást hún illa við þegar átti að vísa henni út af staðnum og hafi hún því slegið tvo dyraverði. Í framhaldi af því var „hún tekin í tök,“ eins og það er orðað í dagbókarfærslunni. Það lagðist illa í karlmann sem var með konunni og réðst hann í kjölfarið á dyraverðina. Lögregla kom á vettvang og skakkað leikinn. Rætt við alla aðila málsins og að því loknu „voru gerendur lausir“.

Fjölþreifinn karlmaður var að sama skapi handtekinn í nótt eftir að tilkynningar bárust af manni sem káfaði á konum í miðbænum. Þegar lögreglan kom á vettvang gátu í það minnsta fjórar konur bent á hann sem geranda. Hann var vistaður í fangageymslu og verður yfirheyrður þegar af honum rennur.