SMS frá Mourinho: Vel gert stóri maður

West Ham hjálpaði Chelsea í ensku deildinni með því að skella Man. City. Það kunni Jose Mourinho, stjóri Chelsea, að meta.

„Jose sendi mér sms þar sem stóð: Vel gert, stóri maður. Það sýnir hversu mikilvægur sigur okkar var fyrir hann og ég tala nú ekki um fyrir okkur," sagði Sam Allardyce, stjóri West Ham, en hans lið hefur óvænt slegið í gegn í deildinni.

„Þessi úrslit voru samt alls ekki fyrir hann. Sigurinn var fyrir okkur og alla hjá West Ham."

Það voru fleiri sem fögnuðu þessum sigri því leikarinn Russell Brand ruddist inn í sjónvarpsviðtal við Allardyce eftir leikinn og gaf honum rembingskoss.