Dagur líklega ekki næsti landsliðsþjálfari Þýskalands

Forráðamenn Füchse Berlin hafa gefið það út að Dagur Sigurðsson verður áfram þjálfari liðsins á næstu leiktíð.

Dagur var einn þeirra sem kom til greina sem eftirmaður Heiner Brand, landsliðsþjálfara Þýskalands, en hann fór í viðtal hjá þýska handknattleikssambandinu vegna þessa.

„Framkvæmdarstjóri félagsins vildi bara binda endi á þessar vangaveltur sem hafa verið á kreiki síðustu þrjá mánuðina,“ sagði Dagur í samtali við Vísi.

„Ég held að það séu engin stórtíðindi að ég sé ekki að taka við þessu starfi,“ bætti hann við en talið er líklegt að Martin Heuberger, núverandi aðstoðarmaður Brand, muni taka við landsliðsþjálfarastarfinu.

„Ef þeir hefðu viljað gera eitthvað meira úr þessu hefðu þeir þurft að leggja fram tilboð til Füchse Berlin en það kom aldrei. Ég lenti því aldrei í þeirri aðstöðu að þurfa að taka ákvörðun.“

Füchse Berlin hefur gengið mjög vel á leiktíðinni og getur tryggt sér þriðja sæti deildarinnar með sigri á Magdeburg á útivelli á morgun.

Liðið hefur nú tveggja stiga forystu á Rhein-Neckar Löwen sem er í fjórða sæti. Efstu þrjú liðin í deildinni komast beint í Meistaradeild Evrópu en liðið sem verður í fjórða sæti þarf fyrst að taka þátt í forkeppninni.

„Það væri frábært að fá að sleppa við það og auðvitað stefnum við að því að enda í þriðja sæti. En við erum sáttir með árangurinn, sama hver niðurstaðan verður. Þetta verður erfiður leikur á morgun en það eru talsvert um meiðsli í okkar liði.“

Hann segir ljóst að það eru spennandi tímar fram undan hjá félaginu.

„Við erum að fá tvo mjög sterka unga leikmenn til okkar og svo Iker Romero frá Barcelona. Við ætlum að reyna að kreista síðustu dropana úr honum,“ sagði hann í léttum dúr.

Dagur segir að ástandið sé þokklegt á landsliðsmanninnum Alexander Petersson.

„Hann hefur verið að spila í síðustu leikjum en er ekki alveg kominn á sama ról og hann var á fyrir áramót. Ég held að hann muni samt klára þennan leik á morgun og svo leikina með landsliðinu sem eru fram undan. En það er alveg ljóst að hann þarf á hvíldinni að halda.“