Eyðir jólunum við varðeld í Kambódíu

Kristín Ketilsdóttir, sem starfar í Shanghai, eyðir jólunum á eyjunni Koh Rong í Kambódíu. „Við erum sex mjög góðir vinir sem búum í Sjanghæ og okkur langaði að breyta til um jólin og heimsækja nýja staði. Við höfðum ferðast til flestra landa í Asíu, en ekkert okkar hafði eytt tíma í Kambódíu og við vorum öll áhugasöm um land og þjóð,“ segir Kristín.

Í hópnum ásamt Kristínu eru Þjóðverji, Ítali, Taívani og þrír Frakkar. „Einn Frakkinn kom með gæsalifur að heiman sem verður jólamaturinn, ásamt hverju því sem boðið er upp á á Koh Rong. Aðstæður þar eru mjög frumstæðar og sérstaklega á þessari eyju, þar sem aðgangur að rafmagni er aðeins á milli klukkan 18 og 22 á kvöldin. Við höfum því öll afsökun fyrir að láta hefðbundinn jólamat eiga sig í ár og allt það stúss sem fylgir,“ segir Kristín og hlær.

Á Þorláksmessumorgun vöknuðu þau klukkan fimm til þess að fylgjast með sólarupprásinni við Angkor Wat. „Það eru þvílík forréttindi að skoða þessi mannvirki og listaverk. Við áttum ógleymanlegan dag, og svo sannarlega ólíkan þeim sem ég hef átt hingað til,“ segir hún. Aðfangadagskvöldi ætla þau að eyða á ströndinni. 

„Við munum líklegast sitja við varðeld, synda í sjónum og gefa hvert öðru gjafir. Ef aðstæður leyfa munum við hringja í okkar nánustu, en vegna þess hve rafmagnið er takmarkað er ekki víst að það verði hægt. Ég ætla því að hafa varann á og hringja áður en við förum með ferjunni yfir,“ segir Kristín.

Gústaf Úlfarsson eyddi jólunum 2012 einn í Dubai í sólinni með McDonald's. „Ég ákvað bara að nota tækifærið og prófa þetta fyrst að ég gat það,“ segir Gústaf. Hann hafði verið að vinna í Afríku og millilenti í Dubai, en í stað þess að fara heim til Íslands ákvað hann að eyða jólunum þar. 

„Ég hafði það bara sem mottó að gera allt sem ekki er hægt að gera á aðfangadag á Íslandi og gera alveg andstæðuna við það sem maður gerir venjulega. Í staðinn fyrir skötu borðaði ég flugvélamat og í staðinn fyrir hamborgarhrygg fékk ég mér McDonald's,“ segir Gústaf. 

Kvöldmáltíðin hans á aðfangadag samanstóð af tveimur ostborgum, frönskum og kók. „Svo varð ég að sjálfsðgðu að fá mér McFlurry í eftirmat, og auðvitað með Oreo.“ 

Restinni af aðfangadegi eyddi hann í að fara í hæstu byggingu heims, liggja í sólinni, synda í sjónum og í vatnsrennibrautagarðinum Atlantis.

„Maður er alltaf skjannahvítur á jólunum, en þarna varð ég eldrauður og flagnaði í staðinn,“ segir Gústi og hlær.

En sá hann ekkert eftir þessari ákvörðun? „Nei, alls ekki. Ég er bara miklu þakklátari fyrir jólin núna og kann að meta þau og fjölskylduna betur," segir hann.