Almennir fjárfestar græddu 42 þúsund krónur

Velta með hlutabréf í N1 nam 733 milljónum króna í gær þegar félagið var skráð á Aðalmarkað Kauphallar íslands. Verð bréfanna hafði við lokun markaða styrkst um 1,1 prósent sem þýðir að almennir fjárfestar sem keyptu bréf í hlutafjárútboði félagsins gátu þá grætt um 42 þúsund krónur.

„Þetta voru um 296 viðskipti yfir daginn og til samanburðar er meðalfjöldi hlutabréfaviðskipta í Kauphöllinni um 90 viðskipti á dag. Bréf almennra fjárfesta hækkuðu um 22,9 prósent frá hlutafjárútboðinu og bréf fagfjárfesta um 4,4 prósent,“ segir Magnús Harðarson, forstöðumaður viðskiptasviðs Kauphalllarinnar.

Almennu fjárfestarnir sem Magnús vísar í keyptu um 7.200 áskriftir í hlutafjárútboði N1 sem lauk 9. desember síðastliðinn. Mikil umframeftirspurn eftir hlutabréfum félagsins, sem er enn önnur vísbendingin um að áhugi almennings á hlutabréfamarkaðinum sé að aukast, leiddi til þess að hámarksúthlutun var 182 þúsund krónur á hverja áskrift.

N1 er þriðja félagið sem skráð er á Aðalmarkað Kauphallarinnar á þessu ári. Hin tvö eru TM og VÍS.

„Á fyrstu viðskiptadögum TM og Vís voru alveg sérlega mikil viðskipti með hlutabréf beggja félaganna. Á milli sex og sjö prósent af útistandandi hlutum í þeim skiptu um hendur á fyrsta degi sem var talsvert meira en í tilfelli N1,“ segir Magnús.

Eggert Benedikt Guðmundsson, forstjóri N1, segir að gærdagurinn leggist vel í sig og að hann sé bjartsýnn á framhaldið.

„Þetta var mjög þægileg byrjun og við vitum að bréf hafa tilhneigingu til að hækka og lækka eftir því sem fram líða stundir. Við erum mjög ánægð með það hvernig allt þetta ferli hefur gengið og félagið var tilbúið til að fara á markað,“ segir Eggert.