Skorar á Vesturlönd að setja rússneska þingmenn í ferðabann

Nikolai Alekseev lögfræðingur og leiðtogi réttindahreyfingar samkynhneigðra í Rússlandi segir að það hafi ekkert upp á sig að sniðganga vörur eins og Stolichnaya vodka til að þrýsta á rússnesk stjórnvöld að bæta ráð sitt varðandi mannréttindi hinsegin fólks. Framleiðendur vöru eins og Stolichnaya hafi engin áhrif á rússnesk stjórnvöld, Vladimir Pútin forseta og þingmenn Dúmunnar.

Vilji vestræn ríki leggja mannréttindabaráttu hinsegin fólks í Rússlandi lið ættu þau að setja ráðherra og þingmenn sem stóðu t.d. að nýlegri lagasetningu sem þrengir mjög réttindi hinsegin fólks í Rússlandi á bannlista, þannig að þetta fólk geti ekki ferðast til Vesturlanda.

Slík aðgerð væri mun líklegri til árangurs en það að sniðganga einstakar vörur frá Rússlandi. Ferðabann á nokkra þingmenn myndi fæla aðra stjórnmálamenn frá því að styðja óréttláta löggjöf gagnvart hinsegin fólki.

Nikolai talar af mikilli reynslu um þessi mál en hann hefur margoft verið handtekinn fyrir tilraunir til að koma á gleðigöngum í Moskvu og víðar og orðið fyrir líkamlegu ofbeldi andstæðinga réttinda hinsegin fólks sem gert hafa aðsúg að litlum hópum fólks sem reynt hafa að fara í gleðigöngur, eins og sést á meðfylgjandi mynd.

Þá handtók rússneska leyniþjónustan hann í fyrra og hélt honum á óþekktum stað í um hálfan mánuð og sleppti honum síðan lausum langt fyrir utan Moskvu.

Stjórnvöld víða á Vesturlöndum spurðust fyrir um hann á meðan enginn vissi hvar hann var, m.a. Össur Skarphéðinsson þáverandi utanríkisráðherra, sem kallaði sendiherra Rússlands á sinn fund vegna málsins.