Ókurteisi færist í vöxt

Ókurteisi og niðurlægjandi framkoma við fólk í þjónustustörfum hefur færst í vöxt á undanförnum árum. Starfsmenn Tryggingastofnunar fá reglulega sérstaka áfallahjálp vegna erfiðra viðskiptavina og hefur verið kennt að hengja áhyggjurnar upp á snaga í lok vinnudags. Fyrr í vikunni missti viðskiptavinur Landsbankans stjórn á sér og réðst á starfsmann bankans, eins og DV greindi frá. Verslunarmannafélag Reykjavíkur hefur nýlokið við herferð til að fá viðskiptavini til að vera kurteisari við fólk í þjónustustörfum vegna þess að niðurlægjandi framkoma viðskiptavina við starfsfólk og virðingarleysi virðist hafa færst í vöxt. Hjá Tryggingastofnun ríkisins eru samskiptin við viðskiptavini almennt góð en Margrét Jónsdóttir, forstöðumaður þjónustumiðstöðvar Tryggingastofnunar, segir að þangað komi margir óánægðir viðskiptavinir vegna eðlis starfseminnar. Fólk fái kannski synjun á umsóknum eða lágar greiðslur og reiðist þess vegna. Vegna þessa eru haldir reglulegir fundir með starfsmönnum þar sem erfiðar uppákomur eru ræddar. Margrét segir þetta lið í áfalllahjálp þar sem starfsmenn ræði sín mál og fólk skiptist á skoðunum og þannig losi starfsmenn sig við óþægindin sem fylgi oft vinnunni. Nýlega fengu starfsmenn nýja einkennisbúninga en þeir hafa það hlutverk að hjálpa starfsmönnum að takast á við erfiðleika í vinnunni. Margrét segir að á kvöldin segi starfsmenn að þeir fari úr búningunum og hengi áhyggjur dagsins inn í skáp. Það sé mjög ánægjulegt. Margrét segir enn fremur að hugsanlega ættu fleiri vinnustaðir að taka þetta upp. Hún taki eftir því sem almennur viðskiptavinur að fólki hiki ekki við að vera ókurteist við starfsfólk og láti dagsformið þá ráða. Af því hafi hún áhyggjur.