Siv heldur áfram að spyrja um Icesave á Alþingi

Siv Friðleifsdóttir þingmaður Framsóknarflokksins heldur áfram að spyrja ráðherra um Icesave-ábyrgðir á alþingi.

Hún hefur lagt fram fyrirspurn til Geirs Haarde forsætisráðherra um hvort hann, embættismenn eða ráðgjafar hans, hafi haft vitneskju um tilboð breska fjármálaeftirlitsins (FSA) um að gegn 200 milljóna punda fyrirgreiðslu væri FSA tilbúið að færa reikninga Icesave yfir í breska lögsögu.

Og hún leggur einnig spurningar fyrir Björgvin G. Sigurðsson um hið sama. Þar bætir hún einnig við spurningu um hvort forstjóri Fjármálaeftirlitsins hafi verið í símasambandi við FSA sunnudaginn 5. október sl.

Siv vill einnig vita hvort Fjármálaeftirlitið, eða forstjóri þess, hafi fyrir yfirtöku íslenska ríkisins á Landsbanka Íslands, haft vitneskju um framangreint tilboð FSA.

Óskað er eftir skriflegum svörum við þessum spurningum.