Lögðu hald á 130 kanna­bis­plöntur í Hafnar­firði

Lögreglan á höfuðborgarsvæðinu stöðvaði kannabisræktun í heimahúsi í Hafnarfirði í vikunni þar sem hald var lagt á um 130 kannabisplöntur á ýmsum stigum ræktunar.

Í tilkynningu frá lögreglu segir að við húsleit hafi lögreglan enn fremur tekið í sína vörslu vopn og fjármuni, sem hún telur vera tilkomna vegna fíkniefnasölu.

„Húsráðendur, tveir karlar á þrítugsaldri, voru handteknir í þágu rannsóknarinnar. Málið telst upplýst.

Við minnum á upplýsingasíma lögreglu 800 5005. Í hann má hringja nafnlaust til að koma á framfæri upplýsingum um fíkniefnamál, eða önnur brot sem fólk hefur vitneskju um. Ábendingum um brot má jafnframt koma á framfæri í einkaskilaboðum á fésbókarsíðu Lögreglunnar á höfuðborgarsvæðinu.“