Formaður endurupptökunefndarinnar: „Ábending sem var hluti af gögnunum“

„Lögreglan framkvæmir þetta, við komum hvergi þar að,“ segir Björn L. Bergsson, formaður endurupptökunefndar vegna Guðmundar- og Geirfinnsmálsins, um handtökur og yfirheyrslur á tveimur mönnum í gær í tengslum við endurupptöku á málinu.

Málið má rekja má aftur til ársins 1974 en þeir Guðmundur Einarsson og Geirfinnur Einarsson hurfu í sitt hvoru lagi og hafa ekki fundist síðar.

Sjá einnig: Tveir menn handteknir og yfirheyrðir

Björn segist ekki vilja tjá sig efnislega um þessar skýrslutökur sem fóru fram í gær. Settur ríkissaksóknari í málinu, Davíð Þór Björgvinsson, óskaði eftir því að mennirnir tveir yrðu handteknir og þeir yfirheyrðir. Það var gert að beiðni endurupptökunefndar að þessi angi málsins yrði kannaður sem snýr einungis að máli Guðmundar Einarsson.

„Það var ábending sem var hluti af gögnunum sem endurupptökunefnd er með sem kallar á það að það þyrfti að skoða þarna einn tiltekinn þráð í málinu og að ríkissaksóknari myndi hlutast til um að það yrði gert og þetta er bara liður í því. Við höfum ekki fengið skýrslu frá lögreglu hvernig þessar yfirheyrslur gengu þannig að við getum ekkert tjá okkur um það,“ segir Björn. 

Hann vildi ekki svara því hvort mennirnir tveir hefðu verið handteknir eða yfirheyrðir vegna málsins áður.

„Ég held að það sé langbest á þessu stigi máls að við séum ekkert að tjá okkur um það. Við getum ekki verið að tjá okkur um einstök gögn eða einstaka atvik sem í því felast.“

Var mönnunum tveimur sleppt að yfirheyrslum loknum.