Ein af fimm bestu hjá ESPN

Helena Sverrisdóttir var á dögunum valin ein af fimm bestu litlu framherjunum í bandaríska háskólakörfuboltanum af bandaríska fjölmiðla­risanum ESPN.

Þetta er mikil viðurkenning fyrir Helenu, sem er nú að hefja lokaár sitt í skólanum en áður hafði hún verið valin meðal 50 bestu leikmannanna fyrir bæði John R. Wooden-verðlaunin og Naismith-verðlaunin. Þau eru virtustu einstaklingsverðlaunin í bandaríska háskólaboltanum sem veitt eru á hverju ári. Það er því ljóst að augu sérfræðinganna verða á Helenu í vetur en hún var með 13,6 stig, 6.7 fráköst og 5,2 stoðsendingar að meðaltali í leik síðasta vetur.

„Þetta er rosalega flott viður­kenning en ég einbeiti mér ekki að þessum hlutum heldur bara því sem ég geri á vellinum. Ég veit hvar ég vil vera eftir þetta tímabil og það er það eina sem ég einbeiti mér að,“ segir Helena. Hún er ekkert farin að hugsa um möguleikana á því að komast inn í WNBA-deildina en svona viður­kenningar hafa vissulega komið henni á kortið.

„WNBA-deildin er svo rosalega lítil, 12 lið og í valinu eru bara þrjár umferðir. Það eru því einungis 36 leikmenn sem eru valdir og af þeim komast um 12-15 leikmenn inn í liðin. Þetta snýst allt saman um hvernig ég og liðið mitt spilum í ár,“ segir Helena, sem veit að það er mikið undir hjá henni í vetur.

„Allar svona viðurkenningar hjálpa til langs tíma litið en þetta snýst samt algjörlega um lokaárið,“ segir Helena, sem verður áberandi í sögu TCU-skólans þegar tímabilið er á enda.

TCU-liðið er til alls líklegt í vetur enda á lista yfir 25 bestu háskólaliðin í ár.

„Við lítum rosalega vel út, líklegast besta lið sem við höfum haft þessi fjögur ár sem ég hef verið hér. Markmiðin eru sett hátt, að endurtaka sigur í deildinni og komast langt inn í NCAA eftir sárt tap í fyrra. Núna fyrir áramót eigum við eitt erfiðasta leikjaplanið sem sést hefur því við spilum við sex topp 20 lið. Þetta verður mjög erfitt en við ætlum okkur að standa okkur vel,“ segir Helena.

TCU er búin að spila einn leik á tímabilinu en liðið er til alls líklegt í Mountain West-deildinni. Helena var með 15 stig, 6 fráköst og 5 stoðsendingar í 58 stiga sigri á Houston Baptist.

„Við spiluðum á móti mun slakari andstæðingi en vorum samt að spila flottan bolta og höfðum gaman af hlutunum. Ég skaut ekki vel, en var sátt með aðra hluti,“ segir Helena, sem vill ekki gefa upp sín markmið í vetur.

„Ég hef að sjálfsögðu mín persónulegu markmið sem bara ég veit. En það sem ég er að einbeita mér að er að nota þessa þjálfun og aðstöðu eins vel og ég get til að eiga sem best mögulegt leikár og byggja á því fyrir næstu plön,“ segir Helena. Hún hefur hins vegar aldrei farið leynt með það að ætla að verða atvinnumaður í körfubolta, hvort sem það verður í Bandaríkjunum eða Evrópu.