Filippseyingar láti ekki undan

Stjórnvöld í Bagdad hvetja Filippseyinga til að láta ekki undan hótunum mannræningja í Írak sem segjast nú vera að undirbúa aftöku filippseysks gísls, ef filippseyskir hermenn verði ekki kallaðir heim. Mannræningjar í Írak hafa nú í haldi filippseyskan karlmann sem þeir hóta að hálshöggva, verði hersveitir landsins ekki kallaðar heim. Aðeins er 51 filippseyskur hermaður í Írak en um 4000 Filippseyingar stunda vinnu þar, aðallega fyrir bandarískar herstöðvar. Hermennirnir eiga samkvæmt áætlun að fara frá Írak þann 20. ágúst en mannræningjarnir krefjast þess að það verði mánuði fyrr, ella verði þessi 46 ára gamli átta barna faðir tekinn af lífi. Haft er eftir fulltrúa filippseyska utanríkisráðherrans á arabísku sjónvarpsstöðinni Al Jazeera að hersveitirnar verði kallaðar heim „sem fyrst“ en forseti Filippseyja, Gloria Arroyo, sagði um helgina að ekkert yrði gefið eftir. Stjórnvöld í Bagdad hvöttu í dag stjórnvöld Filippseyja að láta ekki undan hryðjuverkamönnunum. Bandarísk stjórnvöld hafa lagt mikla áherslu á að þær þjóðir sem eru með herdeildir í landinu láti ekki undan kröfum mannræningja. Nýlega hrósaði varnarmálaráðherrann Donald Rumsfeld bæði Japönum og Suður-Kóreumönnum fyrir að láta ekki undan þó að ríkisborgurum þessara landa hafi verið rænt í Írak. Hann gagnrýndi á sama tíma Spánverja fyrir að kalla hersveitir sínar heim eftir sprenginguna á lestarstöðinni í Madríd í mars. Sagði Rumsfeld að það að gefa eftir væri eins og að hella olíu á eld. Ræningjarnir segjast vera að undirbúa aftöku mannsins. Ekki er vitað nákvæmlega hversu margir erlendir ríkisborgarar eru nú í haldi mannræningja í Írak.