Aprílspá Siggu Kling – Tvíburi: Ef þú þráir ást getur þú fengið hana eins og skot

Elsku Tvíburinn minn. Núna þarft þú að sýna veröldinni mikla þrjósku. Þú þarft að láta vini þína og alla í kringum þig vita að þú gefst ekki upp.

Þú getur kannski skipt um skoðun og ákveðið að fara nýja leið eða breyta til en það er algjörlega þín ákvörðun.

Þú þarft að sjá það að allt heimsins dót mun ekki færa þér hamingju, því hamingjan byggist upp á þeim minningum sem þú býrð til í hvert skipti.

Þegar þú vaknar næstu vikurnar hvern einasta dag, skaltu hugsa:

Ég ætla að skapa góðar minningar í dag.

Þetta skiptir svo miklu máli því þá verður svo miklu meiri léttleiki í kringum þig, þú verður svalari og þá gengur þér betur.

Þú þarft svolítið að fara í andleg málefni, því þau skipta þig meira máli en þú heldur. Þegar þú setur þig yfir á þetta plan, þá muntu gera þér grein fyrir því hvað það er sem þú þráir virkilega að hendi þig.

Það færist yfir þig svo dásamlegur friður þegar líða tekur á mánuðinn og þú finnur að þú getur treyst því að lífið mun virka fyrir þig.

Ef þú þráir ást þá getur þú fengið hana alveg eins og skot. En þú verður að skilgreina það hvernig ást þú vilt annars færðu svo fljótt leiða á henni.

Þú þarft að leita þér að manneskju sem er jarðbundin, lítur upp til þín og opnar fyrir þig dyrnar. Og það er hvort sem þú ert karlkyns eða kvenkyns, elsku Tvíburinn minn.

Þú átt eftir að hrinda mörgum verkefnum í framkvæmd og það er rosalega mikilvægt að þú klárir þau annars fer kvíðadraugurinn að bíta þig í hælinn.

Um leið og þú ert búinn að lesa þessa stjörnuspá skaltu skrifa niður það sem þú virkilega þarft að klára. Svo skalt þú lesa það sem þú skrifar upphátt svo það festist inni í orkunni þinni.

Þú verður svo ofboðslega ánægður þegar líða tekur á maí, því þá ertu búinn að ljúka ótrúlegustu hlutum sem eru búnir að vera sveimandi yfir þér. Húmorinn þinn og þrautseigja munu koma þér langt og þú átt sannarlega eftir að stela senunni af því að þú verður skrefi á undan.

Ekki ofhugsa allt, elskan mín, því að heimurinn er að hjálpa þér.

Knús og kossar,

Sigga Kling

Frægir tvíburar: Örn Árnason leikari, Óli Geir Jónsson plötusnúður, Bjarni töframaður, Hrund Þórsdóttir fréttakona, Össur Skarphéðinsson húmoristi, Johnny Depp leikari, Páll Magnússon fjölmiðlamaður, Kjartan Atli Kjartansson lífsspekúlant, Heimir Hallgrímsson landsliðsþjálfari, Gunnar Einarsson, bæjarstjóri Garðabæjar, Andri Freyr útvarpsmaður og Lýðveldið Ísland.