Kvöldfréttir Stöðvar 2 í beinni útsendingu

Mál tveggja flóttafjölskyldna, sem til stendur að vísa úr landi og hafa verið mikið til umræðu að undanförnu, eru til skoðunar innan kerfisins. Frá þessu greinir Þórdís Kolbrún Reykfjörð Gylfadóttir dómsmálaráðherra á Facebook í dag. Til að tryggja jafnræði hafi hún þó ekki heimild til að stíga inn í einstök mál. Fjallað verður ítarlega um málefni flóttabarna á Íslandi í kvöldfréttum Stöðvar 2 á eftir og rætt við fulltrúa Rauða krossins og Útlendingastofnunar.

Þá verður rætt við Boga Nils Bogason, forstjóra Icelandair en hann segir að auka þurfi nýtingu starfsfólks og að launakostnaður sé of hár. Þá þurfi að endurskoða rekstur innanlandsflugsins.

Ítalski sósíalistinn David-Maria Sassoli var í dag kjörinn til að gegna embætti forseta evrópuþingsins til næstu tveggja ára. Kjör hans markar lokahnykkinn á maraþonviðræðum leiðtoga Evrópusambandsins um skipanir í veigamestu embætti sambandsins.

Þá segjum við einnig frá því að áform Mýrdælinga um að hefja á ný siglingar með ferðamenn á hjólabátum við Reynisdranga eru strand í kerfinu þar sem ekki fást tilskilin leyfi.

Þetta og margt fleira í kvöldfréttum á samtengdum rásum Stöðvar 2 og Bylgjunnar klukkan 18:30.