Greiðfært á Suðausturlandi en öku­menn beðnir um að fara var­lega

Opnað var fyrir umferð um veginn frá Lómagnúpi að Jökulsárlóni um níu leytið í dag. Ökumenn eru þó beðnir um að fara varlega þar sem klæðning fauk af veginum á kafla við Lómagnúp.

Á Norðurlandi er enn þungfært og þæfingur eða snjóþekja á flestum leiðum. Vegurinn um Ljósavatnsskarð er því enn lokaður er stefnt er að því að taka stöðuna á ný klukkan 12 í dag. Þá er ófært um Hófaskarð og Hálsa á Norðausturlandi.

Svipað ástand er á Vestfjörðum en þar er þæfingur, snjóþekja eða hálka og skafrenningur á flestum leiðum og ófært á Klettsháls og norður í Árneshrepp. Skafrenningur og snjókoma á Steingrímsfjarðarheiði.

Vegagerðin hefur lokað fjölda vega í dag vegna veðurs. Víðast hvar er vetrarfærð og mjög víða skafrenningur og fer veður versnandi í flestum landshlutum. Flestar leiðir á Suðvesturlandi eru greiðfærar þó eitthvað sé um hálkubletti á fjallvegum. Þá er mjög hvasst undir Hafnarfjalli, á Kjalarnesi og á sunnanverðu Snæfellsnesi.

Veðurstofan hefur gefið út gula veðurviðvörun sem er í gildi allt frá Vestfjörðum og austur eftir öllu landinu til Suðvesturlands. Norðaustan hvassviðri eða stormur fer yfir landið í dag og má búast við lélegu skyggni og erfiðum akstursskilyrðum á vegum. Þó er búist við því að það taki að lægja smám saman með kvöldinu og í nótt.

Hægt er að fylgjast með nýjustu upplýsingum um færð á vegum frá Vegagerðinni hér að neðan.