Þórunn Erna tók við mæðra- og nýburapakka

LÍF - styrktarfélag kvennadeildar Landspítala, fagnaði 10 ára afmæli um helgina. Félagið var stofnað þann 7. desember 2009 og fagnaði félagið stórafmælinu í Kringlunni með því að kynna starfsemi sína fyrir gestum og gangandi. Þetta kemur fram í fréttatilkynningu frá Líf.

Tilgangur félagsins hefur frá upphafi verið að styrkja kvennadeild Landspítalans, bæta aðbúnað og þjónustu við konur og fjölskyldur þeirra á meðgöngu, í fæðingu og sængurlegu sem og kvenna sem þurfa umönnun vegna kvensjúkdóma.

Áhugaverðar nýjungar í fjáröflun félagsins eru kort sem bjóða nýja einstaklinga velkomna í heiminn og mánaðakort sem svo vinsælt er að nota til að taka myndir af ungbörnum fyrstu mánuði þeirra eru meðal nýjunga í fjáröflun félagsins.

Fyrr í haust kynnti félagið nýja Mæðra- og nýburapakka í samstarfi við Rekstrarvörur en pakkinn inniheldur allt sem móðir og barn þurfa fyrstu dagana eftir fæðingu. Rekstrarvörur selja pakkann en allur ágóði af sölu hans rennur til Lífs. Eins og sjá má á meðfylgjandi myndum þá tók Þórunn Erna Clausen við Mæðra- og nýburapakka frá félaginu en hún á von á sér á næstu vikum en leikkonan, söngkonan og lagasmiðurinn og Olgeir Sigurgeirsson eiga von á sínu fyrsta barni saman.

Kolbrún Björnsdóttir, framkvæmdastjóri Lífs, segir í tilkynningunni þessa fjáröflun nauðsynlega til að geta stutt við kvennadeildina, enda séu verkefnin mörg. Á árinu hafi félagið safnað fyrir nýjum vöggum og nú sé verið að fjármagna breytingar á  bráðaþjónustu kvennadeildar auk annarra verkefna. Endurnýjun eigi sér alltaf stað bæði á húsgögnum og tækjum auk þess sem reynt sé að hafa umhverfið sem notalegast til að auka vellíðan þeirra sem á deildunum dvelja.