Körfubolti

Fór snemma í jólafrí og kemur ekki aftur

Óskar Ófeigur Jónsson skrifar
Chandler Smith í leik með Snæfelli í vetur.
Chandler Smith í leik með Snæfelli í vetur. Vísir/Vilhelm

Chandler Smith hefur spilað sinn síðasta leik fyrir Snæfell í Domino´s deild kvenna í körfubolta.

Chandler Smith var ekki með Snæfelli á móti Skallagrími í gær og missti líka af leiknum á undan vegna veikinda.

Snæfell tilkynnti síðan í gær að Snæfell og Chandler Smith hafi náð samkomulagi um að sú síðarnefnda spili ekki meira með liðinu á tímabilinu. Þjálfarar Snæfellsliðsins eru í leit að nýjum leikmanni sem kemur í fyrsta leik á nýju ári.

Chandler Smith var með 14,5 stig og 5,0 stoðsendingar að meðaltali í leik í átta deildarleikjum með Snæfelli í vetur.  Hún lækkaði hins vegar úr 16,2 stigum og 5,8 stoðsendingum í leik í október niður í 11,7 stig og 3,7 stoðsendingar að meðaltali í leik í nóvember þar sem hún hitti aðeins úr 17 prósent þriggja stiga skota sinna.

Snæfellsliði hefur aðeins unnið tvo af tíu deildarleikjum sínum og þarf hreinlega á munu meira framlagi frá bandarískum leikmanni sínum en því sem Chandler Smith var að skila.

Hin bandaríska Keira Breeanne Robinson fór sem dæmi á kostum gegn kanalausu Snæfellsliði í gær og var með 35 stig, 11 fráköst, 8 stolna bolta og 7 stoðsendingar í 76-65 sigri Skallagríms á Snæfelli.

Snæfell verður því einnig án bandarísks leikmanns í síðustu þremur leikjum sínum fyrir jól en næsti leikur er á móti Grindavík á miðvikudagskvöldið.

Grindavík er einmitt eitt af þremur liðum Domino´s deildar kvenna sem hefur skipt um bandarískan leikmann á þessu tímabili en hin eru Haukar og Breiðablik. Snæfell bætist síðan í hópinn þegar nýr bandarískur leikmaður kemur í janúar.




Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.