Erlent

Þriðja hvert barn vannært

Þórgnýr Einar Albertsson skrifar
UNICEF einbeitti sér að næringu og matarræði í skýrslunni.
UNICEF einbeitti sér að næringu og matarræði í skýrslunni. Mynd/UNICEF

Eitt af hverjum þremur börnum undir fimm ára aldri býr við vannæringu og tvöfalt fleiri við lélegt mataræði. Þetta segir í nýrri skýrslu Barnahjálpar Sameinuðu þjóðanna.

Í fyrsta skipti í tuttugu ár fjallar The State of the World's Children, árleg flaggskipsskýrsla UNICEF, um stöðu barna með tilliti til næringar og mataræðis. Niðurstöðurnar eru afar neikvæðar og segir Henrietta Fore, framkvæmdastjóri UNICEF, að tölurnar sem birtast í skýrslunni séu ekki einungis slæmar fyrir hin vannærðu börn heldur fyrir allt mannkynið.

Vandinn er mestur í Suður-Asíu, þar sem helmingur barna þjáist annað hvort af ofþyngd eða vannæringu. Staðan er litlu skárri í Austur- og Suður-Afríku þar sem hlutfallið er 42 prósent og svo rúm 39 prósent í Vestur- og Mið-Afríku.

UNICEF leggur meðal annars til að matarbirgjar verði hvattir til þess að útvega börnum hollan, einfaldan og ódýran mat, að heilbrigt fæðuumhverfi verði skapað, að fjölskyldur verði valdefldar til að krefjast næringarríkrar fæðu og að dregið verði úr framboði á óhollri fæðu með sykursköttum og sambærilegri löggjöf.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.