Bíó og sjónvarp

Halda opnar prufur fyrir Eurovision-myndina á Húsavík

Birgir Olgeirsson skrifar
Will Ferrell og Rachel McAdams leika íslenska söngvara í myndinni.
Will Ferrell og Rachel McAdams leika íslenska söngvara í myndinni. Vísir/Getty

Opnar prufur fyrir Eurovision-mynd Will Ferrell verða haldnar í húsnæði Leikfélags Húsavíkur næstu daga. Greint er frá þessu á Facebook-síðu Eskimo Casting en þar er ekki tilgreint hvaða verkefni þetta er.

Búið var að boða að Eurovision-myndin verði tekin upp á Húsavík og miðað við hvernig hlutverkunum er lýst á síðunni má ætla að það tengist þessari mynd.

Sér í lagi vegna þess að leitað er að bassaleikara á besta aldri, 55 til 70 ára, karlkyns harmonikku leikara og þrettán til sextán ára gömlum strák sem kann á trommur.

Þá er einnig leitað að karlmanni sem kann að rýgja rollu, karlmanni sem kann að slægja fisk og hjónum á besta aldri.

Eru allir áhugasamir velkomnir að sækja um og eru bæjarbúar hvattir til að láta orðið berast.

Fara prufurnar fram á milli klukkan 16 og 20 í dag, morgun og föstudag.



Eurovision-myndin mun segja frá þeim Lars Erickssong og Sigrit Ericksdottur sem Will Ferrell og Rachel McAdams leika. Þau munu fá það einstaka tækifæri að vera fulltrúar Íslands í Eurovision. Er eyðimerkur ganga Íslendinga sögð eiga að vera ein af þungamiðjum myndarinnar. Ísland hefur tekið þátt í Eurovision frá árinu 1986 en aldrei unnið.

Pierce Brosnan mun leika föður Will Ferrells í myndinni en sá á að vera myndarlegasti maður Íslands.

Björn Hlynur Haraldsson mun leika fyrrverandi kærasta Rachel McAdams og á að vera fremur ósáttur við að hún sé eitthvað að hanga með persónu Will Ferrell í myndinni.

Bandaríska söngkonan Demi Lovato hefur verið ráðin til að leika Katiönu í þessari mynd en sú á að vera besta söngkona Íslands.

Á persóna Rachel McAdams að kom frá smábæ á Íslandi en þær senur verða teknar upp á Húsavík eins og Vísir hefur greint frá. Björn Hlynur greindi frá því í samtali við Vísi að hann hefði rætt við Rachel McAdams á tökustað myndarinnar í Lundúnum. Þar sagði hann McAdams frá því að ein af stærstu Eurovision-stjörnum Íslands, Birgitta Haukdal, kæmi frá Húsavík en McAdams hafði ekki hugmynd um hver Birgitta Haukdal var þegar hún ræddi við Björn Hlyn.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.