Erlendir fjölmiðlar hafa í dag fjallað um regnbogafánana sem tóku á móti Mike Pence varaforseta Bandaríkjanna við Höfða, og víðar í Reykjavík, í gær. Fánarnir hafa einnig vakið mikla lukku á samfélagsmiðlum. Þá birti varaforsetinn dramatískt myndband af Íslandsheimsókninni á Facebook-síðu sinni í dag sem nálgast má neðst í fréttinni.

Fánarnir vöktu mikla athygli í gær og lýstu margir yfir ánægju með framtak stofnana og fyrirtækja í Borgartúninu, sem flögguðu mörg regnbogafánum hinseginfólks.

Afstaða Mike Pence til hinsegin fólks er nokkuð skýr. Hann hefur lýst sig andsnúinn hjónaböndum samkynhneigðra, gagnrýnt löggjöf sem vernda á hinsegin fólk fyrir hatursglæpum og fengið transfólk rekið úr bandaríska hernum með breyttum reglum.

Sjá einnig: Regnbogafánar í rigningu við Höfða

Hugbúnaðarfyrirtækið Advania reið á vaðið í gær og vísar breska dagblaðið Guardian m.a. í Ægi Má Þórisson forstjóra fyrirtækisins í umfjöllun sinni. Ægir sagði í samtali við Vísi í gær að markmiðið með fánunum væri að sýna stuðning fyrirtækisins við réttindabaráttu hinseginfólks „alla daga, ekki bara suma daga.“

Þá eru regnbogafánar stéttarfélagsins Eflingar einnig nefndir í frétt Guardian. Umfjöllunin hefur greinilega vakið mikla athygli en þegar þetta er ritað situr hún í fyrsta sæti yfir mest lesnu fréttir dagsins á vef dagblaðsins. Sömuleiðis eru marglitaðar kveðjur Íslendinga til Pence teknar til umfjöllunar á vef bandaríska vefmiðilsins The Hill og á vef Huffington Post.

Miðlarnir taka einnig regnbogalituð armbönd forsetahjónanna Guðna Th. Jóhannessonar og Elizu Reid til umfjöllunar. Í frétt Guardian er vísað í tíst Justins Sink, blaðamanns hjá Bloomberg sem virðist fylgja Pence á ferðalagi sínu.

Þar birtir Sink skjáskot af Facebook-færslu stjórnmálafræðingsins Baldurs Þórhallssonar, sem vakti athygli á regnbogaarmböndum Guðna og setti í samhengi við samstöðu hans með réttindabaráttu hinseginfólks. Sink, sem og erlendir fjölmiðlar, hafa túlkað armböndin sem skilaboð til Pence.

Í svari frá forsetaembættinu við fyrirspurn Vísis segir þó að skömmu eftir embættistöku hafi Guðna verið gefið regnbogaarmband. Síðan þá hefur hann borið slíkt armband, sem og armband frá Krafti, stuðningsfélagi fyrir ungt fólk sem greinst hefur með krabbamein og aðstandendur þeirra. Það sé því ekkert nýtt að forsetinn beri slíkt armband.

Regnbogafánar Íslendinga við komu Pence hafa einnig vakið mikla athygli á samfélagsmiðlum. Áðurnefndur Sink tísti í gær mynd sem hann tók af regnbogafánum Advania við Höfða. Þúsundir Twitter-notenda hafa nú líkað við myndir hans og Jill Colvin, blaðamanns AP-fréttaveitunnar, af fánunum við Höfða. Tístin má sjá hér að neðan.

Pence hélt af landi brott eftir fund sinn með Katrínu Jakobsdóttur forsætisráðherra í gærkvöldi. Í dag var birt myndband frá heimsókninni á Facebook-síðu varaforsetans. Þar þakkaði hann Íslendingum fyrir móttökurnar.

„Það var frábært að vera á Íslandi í gær til að staðfesta sterkt og mikilvægt samband þjóðanna okkar tveggja!“ skrifaði Pence við myndbandið.

Færsluna og myndbandið, sem státar af nokkuð dramatísku undirspili, má sjá hér að neðan.