Tækniblaðamenn víða um heim fengu í gær boðskort frá Apple og fékkst þar staðfest að fyrirtækið hefur boðað til kynningarfundar þann 10. september næstkomandi í höfuðstöðvunum í Cupertino, Bandaríkjunum.

Fastlega er búist við því að stærsta kynningin verði nýjasti síminn í iPhone-línunni, það er að segja iPhone 11. Samkvæmt Techcrunch er búist við því að þrjár útgáfur verði kynntar. Ein hefðbundin og svo tvær mismunandi sem deila viðskeytinu „pro“. Verða það dýrari símar línunnar.

Þótt ekki liggi fyrir hvernig 11 verður frábrugðinn XS hefur verið orðrómur á kreiki um nýja og öflugri örflögu, þrefalda myndavél og að síminn geti hlaðið aukatæki á borð við AirPods þráðlaust.