Golf

Gleymdi vegabréfinu sínu og 40 kylfingar fengu ekki kylfurnar sínar

Óskar Ófeigur Jónsson skrifar
Lexi Thompson með kylfusveininum sínum sem þurfti að sækja vegabréfið.
Lexi Thompson með kylfusveininum sínum sem þurfti að sækja vegabréfið. Getty/Stuart Franklin
Bandaríski kylfingurinn Lexi Thompson er ekki sú vinsælasta meðal kylfinganna sem eru að fara að keppa á Opna breska risamóti kvenna í golfi í þessari viku.



Það er nefnilega Lexi Thompson að kenna að fjörutíu þeirra misstu af mikilvægum æfingahring á mánudaginn.



Flestir kylfingarnir á Opna breska meistaramótinu eru að keppa á risamótum tvær vikur í röð því á sunnudaginn lauk keppni á Evian risamótinu í Frakklandi.



Kylfingarnir sjálfir flugu til Englands en það var fengin sendiferðabíll til að flytja golfpokana, kylfurnar og allan farangur keppendanna.







Þegar Lexi Thompson mætti út á flugvelli í Genf þá áttaði hún sig á því að hún var ekki með vegabréfið sitt. Hún hafði sett vegabréfið í töskuna sem var í sendiferðabílnum.



Ian Wright, fyrrum kylfusveinn Seve Ballesteros heitins, fékk það verkefni að keyra bílnum en ferðalagið átti að taka tólf tíma. Það átti hins vegar eftir að breytast.



Þegar hann var búinn að keyra í 45 mínútur frá Genf þá fékk hann símtal um að stoppa svo að kylfusveinn Lexi Thompson gæti komið til hans og náð í vegabréfð hennar.



Það tók sinn tíma að finna tösku Lexi Thompson og í samtali við Golf Channel sagðist Ian Wright hafa þurft að taka næstum því helminginn af öllum töskunum út. Bílinn var troðinn af töskum. Ian Wright var allt annað en sáttur.



Umboðsmaður Lexi Thompson afsakaði sína konu. „Þetta voru mistök og hún gat aldrei vitað að þau hefðu svona miklar afleiðingar fyrir alla hina kylfinganna,“ sagði Bobby Kreusler, umboðsmaður Lexi Thompson.



Já vandræði Ian Wright voru nefnilega rétt að byrja þegar hann var loksins búinn að finna vegabréfið og koma töskunum aftur inn í bílinn. Hann keyrði alla nóttina en missti samt af ferjunni yfir til Englands. Þegar hann komst loksins yfir Ermarsundið daginn eftir þá lenti hann í morgunumferðinni í kringum London. Hann komst loksins á staðinn klukkan fimm.



Þá voru mótshaldarar búnir að loka vellinum og kylfingarnir 40 sem voru með kylfurnar sínar í bílnum gátu því ekki spilað völlinn í gær.



Það væri síðan eftir öllu að Lexi Thompson myndi síðan vinna Opna breska mótið í ár. Þessi 24 ára Flórída stelpa hefur unnið eitt risamóti (ANA Inspiration 2014) en hefur best náð áttunda sæti á Opna breska en það var árið 2016. Lexi missti af niðurskurðinum á Evian mótinu.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.