Bíó og sjónvarp

Stranger Things slær áhorfendamet Netflix

Vésteinn Örn Pétursson skrifar
Nokkrir leikarar þáttanna á góðri stundu. (F.v: Joe Keery, Finn Wolfhard, Natalia Dyer og Charlie Heaton)
Nokkrir leikarar þáttanna á góðri stundu. (F.v: Joe Keery, Finn Wolfhard, Natalia Dyer og Charlie Heaton) Vísir/Getty

Þriðja þáttaröð bandarísku vísindaskálskaparþáttanna Stranger Things, sem framleiddir eru af streymisveitunni Netflix, hefur sett nýtt met þegar kemur að áhorfi á efni veitunnar. Þáttaröðin fór í loftið á Netflix þann 4. júlí síðastliðinn, en síðan þá hafa rúmlega 40 milljónir byrjað á þáttaröðinni, á aðeins 14 dögum.

Frá þessu greindi streymisveitan vinsæla í tísti þar sem einnig kemur fram að rúmar 18 milljónir Netflix-reikninga hafi þegar klárað þriðju þáttaröðina í heild sinni. Fyrra met streymisveitunnar átti sjónvarpsmyndin Murder Mystery með Adam Sandler, Jennifer Aniston og Ólaf Darra í aðalhlutverkum.



Það er mat þeirra sem fylgst hafa með krökkunum knáu frá Hawkins í Indiana, þar sem þættirnir gerast, að þriðja þáttaröðin sé sú blóðugasta og jafnframt sú myndrænasta, þar sem hún skartar atriðum sem skilja áhorfendur eftir með ónotatilfinningu í maganum. Margir virðast þó einfaldlega ekki geta sleppt því að horfa.

Shawn Levy, einn framleiðenda þáttanna hefur þá upplýst um að þriðja þáttaröðin verði ekki sú síðasta. Þáttaröð fjögur af Stranger Things eigi „pottþétt eftir að gerast.“ Netflix á þó eftir að staðfesta þær fregnir, en miðað við vinsældir þáttanna er ólíklegt að streymisrisinn vilji sleppa takinu af gullgæsinni sem þættirnir hafa reynst vera.

„Ég skal segja ykkur það að við erum með nokkuð skýra hugmynd um hvað kemur til með að gerast í fjórðu seríu. Sería fjögur er pottþétt að fara að gerast,“ sagði Levy í samtali við miðilinn Collider.

„Það eru miklar líkur á annarri þáttaröð í kjölfar hennar [þeirrar fjórðu] en það er óákveðið að svo stöddu.“
 


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.