Þingmenn orðnir langeygir eftir fjármálaáætlun

„Það er ekki einu sinni búið að boða okkur á fund fjárlaganefndar,“ segir Inga Sæland 2. varaformaður fjárlaganefndar.

Fjármálaáætlun ríkisstjórnarinnar liggur ekki fyrir enn. Þingmenn sem Vísir hefur rætt við segja þetta fordæmalaust, ekki sé hægt að slíta þinginu áður en hún hefur verið afgreidd.

Inga Sæland telur einsýnt að stjórnin sé í bullandi vandræðum með að hnoða áætlun saman. Þann vanda megi að einhverju leyti rekja til mismunandi áherslna stjórnarflokkanna, þá Sjálfstæðisflokks og Vinstri grænna.

Erfiður niðurskurður fyrirliggjandi

„Miðað við hvað þessi fjárlagastefna fékk harkaleg viðbrögð; sýndi að milli þessarar fjárlagastefnu og þeirrar sem er í gildi er 20 milljarða samdráttur samtals á þessum fimm árum, frá því sem gert var ráð fyrir. Þar af 8 milljarðar beint sem draga á til baka sem ætlaðir voru í málefni öryrkja,“ segir Inga. Hún segist hafa heyrt af því að ekki einu sinni fólk í ráðherraliðinu hafi verið upplýstir um þetta, sem hlýtur að vera ávísun á glundroða innan ríkisstjórnarinnar.

Inga bendir sérstaklega í umsögn fjármálaráðs í þessu sambandi. Þar er um óháð ráð að ræða sem telur að breytingar í hagþróun, eins og þær birtast í nýjustu spá Hagstofu Íslands, nægi ekki einar og sér sem fullgilt tilefni til endurskoðunar gildandi fjármálastefnu, eins og þingsályktunartillaga Bjarna Benediktssonar fjármálaráðherra geri ráð fyrir.

„Hins vegar eru merki um að samdrátturinn gæti jafnvel orðið skarpari og lengri en spáin segir til um. Þannig má ætla að ef stefnan væri ekki endurskoðuð nú gæti slíkt reynst nauðsynlegt í náinni framtíð.

Það gæti kallað á sársaukafullar ráðstafanir nú í opinberum fjármálum sem myndu reynast óskynsamlegar eftir á að hyggja og brjóta í bága við grunngildi.

Bent skal á að ábyrgð hvílir á stjórnvöldum varðandi þá ákvörðun að nýta ekki heimild laga til að víkja tímabundið til hliðar þeim tölulegu skilyrðum sem 7. gr. laga um opinber fjármál setur,“ segir meðal annars í umsögn fjármálaráðs.

Miðflokkurinn með óvænta líflínu fyrir ríkisstjórnina

Þeirri kenningu hefur verið fleygt í eyru blaðamanns Vísis að innanbúðarvandi ríkisstjórnarinnar í því sem snýr að fjármálaáætlun valdi því ekki síður að ekki tekst að ljúka þinginu en kröfugerð Miðflokksins og/eða athugasemdir þingmanna Sjálfstæðisflokks við orðalag í samkomulagi ríkisstjórnarinnar og Miðflokksins.

„Til að draga athyglina frá vandræðagangi ríkisstjórnarinnar vegna fjármálaáætlunar? Hver veit?“ segir Inga sem telur þetta ekki ósennilegt.

„Ef þú ert að koma með eitthvað inn í þinglega meðferð áttu að vera búinn að ganga með málið í gegnum fastanefndina og umsagnaraðilar kost á að gera athugasemdir og fara yfir umsögnina. Við eru ekki enn búin að sjá fjárlagaáætlun í fjárlaganefnd. Þannig að Miðflokkur eða ekki Miðflokkur, ef staðan er raunverulega svona er Sigmundur Davíð að létta af þeim þrýstingi.“

Ekki tókst að ná tali af Willum Þór Þórssyni formanni fjárlaganefndar.