Íslenski boltinn

Ekki í fyrsta sinn sem Skagamenn koma upp með látum

Óskar Ófeigur Jónsson skrifar
Arnar Már Guðjónsson stjórnar fagnaðarlátunum eftir einn sigurleikinn í sumar.
Arnar Már Guðjónsson stjórnar fagnaðarlátunum eftir einn sigurleikinn í sumar. Vísir/Daníel

Nýliðar Skagamanna sitja á toppi Pepsi Max deildar karla í knattspyrnu eftir 2-0 sigur á FH-ingum á Akranesi í gærkvöldi.

ÍA hefur unnið Íslandsmeistara Vals og stórlið FH í síðustu deildarleikjunum sínum og hefur heillað marga með frammistöðu sinni í upphafi Íslandsmótsins.

Þetta er hins vegar ekki í fyrsta sinn sem Skagamenn koma upp í efstu deild með látum. Þetta er nefnilega í þriðja skipti sem Skagamenn sitja sem nýliðar í efsta sætinu eftir fjórar umferðir og svo voru þeir í öðru sæti eftir fjóra leiki á mjög sögulegu nýliðatímabili fyrir 27 árum síðan.

Þeir eru einu nýliðarnir sem hafa orðið Íslandsmeistarar (1992) og Skagamenn voru með fullt hús stiga eftir fjórar umferðir þegar þeir komu upp í deildina sumarið 2012.

Það sem liðin 2012 og liðið í ár eiga sameiginlegt að í báðum liðum var Jóhannes Karl Guðjónsson í aðalhlutverki hjá Skagaliðinu.

Hann er núna á fyrsta ári með Skagamenn í Pepsi Max deildinni en fyrir sjö árum var hann að koma heim eftir meira en áratug í atvinnumennsku. Samtals hafa þessi tvö nýliðalið með Jóhannes Karl í fararbroddi fengið 22 stig af 24 mögulegum í fyrstu fjórum umferðunum.

Skagamenn voru kannski með fleiri stig eftir fjóra leiki á nýliðaárinu 2012 (12 á móti 10) en liðið í ár skoraði fleiri mörk í fyrstu fjórum leikjum sínum (9 á móti 8). Skagamenn hafa skorað tvö mörk eða fleiri í öllum fjórum leikjum sínum í sumar. Skagamenn eru farnir að skora mörkin á ný sem gleður marga.

Skagamenn byrjuðu einnig mjög vel þegar þeir voru nýliðar í deildinni sumarið 1969. Skagaliðið varð þá í efsta sætinu eftir fjórar umferðir en endaði síðan í öðru sæti um haustið. Þeir unnu síðan Íslandsmeistaratitilinn sumarið 1970.

Stig og mörk eftir fyrstu fjóra leikina hjá síðustu nýliðaliðum ÍA:
2019 - 10 stig og 9 mörk (1. sæti)
2015 - 4 stig og 3 mörk (10. sæti)
2012 - 12 stig og 8 mörk (1. sæti)
1992 - 8 stig og 6 mörk (2. sæti)
1969 - 5 stig og 6 mörk (1. sæti)



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.