Erlent

Leiðtogi ETA handtekinn eftir sautján ár á flótta

Gunnar Reynir Valþórsson og Samúel Karl Ólason skrifa
Josu Ternera í Bilbao árið 2002.
Josu Ternera í Bilbao árið 2002. EPA/ALFREDO ALDAI

Pólitískur leiðtogi ETA samtakanna, aðskilnaðarhreyfingar Baska, sem álitin eru hryðjuverkasamtök af Evrópusambandinu, hefur verið handtekinn eftir að hafa verið í sautján ár á flótta. José Antonio Urrutikoetxea, sem gengur undir nafninu Josu Ternera, var handtekinn í frönsku ölpunum í bænum Sallanches í sameiginlegri aðgerð frönsku og spænsku lögreglunnar.

Hann er sakaður um fjölmörg morð en ETA háðu blóðuga baráttu fyrir sjálfstæði Baska í rúm fjörutíu ár. Samtökin lýstu því yfir í fyrra að þau væru hætt störfum en rúmlega átta hundruð manns lágu í valnum áður en yfir lauk, eða þegar samtökin tilkynntu um vopnahlé árið 2011.

Ternera, sem er 68 ára gamall, er sagður alvarlega veikur og lögreglan komst á spor hans þegar hann var á leið á spítala. Á meðal þess sem Ternera er sakaður um er bílsprengjuárás sem gerð var fyrir utan herstöð spænsku herlögreglunnar í Zaragoza árið 1987 þar sem ellefu létu lífið, þar á meðal fimm börn.

Hann sendi frá sér hljóðupptöku í mái í fyrra þar sem hann sagði ETA hafa verið lagt niður og að samtökin væru ekki lengur starfandi. Ternera hefur verið eftirlýstur frá því í nóvember 2002 þegar hann mætti ekki fyrir dómara á Spáni vegna árásarinnar í Zaragoza.

Spænskir dómstólar vilja rétt yfir Ternera fyrir glæpi gegn mannkyninu. Þrír aðrir meðlimir ETA hafa verið ákærðir fyrir sömu glæpi en þeir sitja í fangelsum í Frakklandi og hefur ekki verið réttað yfir þeim á Spáni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.