Formúla 1

Upphitun: Pressa á Ferrari í eyðimörkinni

Bragi Þórðarson skrifar
Vettel náði aðeins fjórða sætinu í Ástralíu eftir að hafa verið hraðastur í prófunum
Vettel náði aðeins fjórða sætinu í Ástralíu eftir að hafa verið hraðastur í prófunum Getty

Önnur umferðin í Formúlu 1 fer fram í Barein á sunnudaginn. Brautin í eyðimörkinni er afar teknísk en það er þó hitinn sem er helsta áskorun ökuþóranna.
Hitinn er þó ekki jafn slæmur og hann var nú þegar að tímasetning kappakstursins var færð árið 2014. Nú byrjar kappaksturinn að kvöldi til og keyra bílarnir inn í nóttina.
Valtteri Bottas stóð uppi sem sigurvegari í Ástralíukappakstrinum fyrir tveimur vikum. Liðsfélagi hans hjá Mercedes, fimmfaldi heimsmeistarinn Lewis Hamilton, kom annar í mark.
Alltaf þegar að lið endar í fyrsta og öðru sæti í fyrstu keppni hefur það þýtt að liðið verði heimsmeistari bílasmiða. Auk þess hefur ökumaðurinn sem vinnur í því tilfelli alltaf orðið heimsmeistari ökuþóra. Það má því með sanni segja að sögubækurnar eru með Bottas.

Bottas fagnar sigrinum í Ástralíu Getty

Baráttan um sigur gæti orðið milli þriggja liða
Samstarf Red Bull og Honda byrjaði vel er Max Verstappen kom þriðji í mark í Melbourne. Lykill að velgengni í Barein hefur ávalt verið góð vél og verður því áhugavert að fylgjast með Red Bull bílunum um helgina.
Öll pressan er á Ferrari eftir að ökumenn liðsins náðu aðeins fjórða og fimmta sæti í Ástralíu. Ferrari bíllinn virtist vera sá hraðasti í prófunum en annað kom í daginn í fyrstu keppninni.
,,Ég trúi ekki öðru en að Ferrari muni koma sterkari til leiks í Barein’’ sagði Toto Wolff, yfirmaður Mercedes, á blaðamannafundi fyrir keppnina.
Æfingar, tímatökur og kappaksturinn verða að sjálfsögðu allt í beinni á Stöð 2 Sport. Ræst verður af stað í kappaksturinn klukkan þrjú á sunnudaginn.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.