Körfubolti

Klay hitti úr tíu fyrstu þriggja stiga skotunum sínum í sigri á Lakers

Óskar Ófeigur Jónsson skrifar
Klay Thompson var óstöðvandi í nótt.
Klay Thompson var óstöðvandi í nótt. Getty/Harry How
Klay Thompson var sjóðandi heitur í nótt þegar Golden State Warriors hélt sigurgöngu sinni áfram í NBA-deildinni í körfubolta. James Harden skoraði enn einu sinn yfir 30 stig og Luka Doncic var með þrennu en báðir þurftu að sætta sig við tap.





Klay Thompson jafnaði NBA-met með því hitta úr tíu fyrstu þriggja stiga skotum sínum en hann skoraði 44 stig í 130-111 sigri Golden State Warriors á Los Angeles Lakers. Þetta var áttundi sigurleikur Golden State liðsins í röð.

Klay hitti alls úr 10 af 11 þriggja stiga skotum sínum og alls 17 af 20 skotum. Hann skoraði meðal annars 23 stig í þriðja leikhlutanum þar sem hann setti niður sjö þriggja stiga skot.

Kevin Durant bætti við 20 stigum og Stephen Curry var með 11 stig og 12 stoðsendingar en hitti aftur á móti aðeins úr 2 af 10 þriggja stiga skotum sínum. Ivica Zubac var stigahæstur hjá Lakers með 18, Brandon Ingram skoraði 17 stig og Kyle Kuzma var með 16 stig.

LeBron James, Lonzo Ball og Rajon Rondo misstu allir af leiknum en Lakers hefur aðeins unnið 5 af 14 leikjum sínum síðan liðið missti LeBron James í nárameiðsli.





Joel Embiid skoraði 32 stig og tók 14 fráköst þegar Philadelphia 76ers vann 121-93 sigur á Houston Rockets. James Harden skoraði 37 stig í sínum tuttugasta leik í röð með 30 stig eða meira. Það dugði skammt. Embiid var kominn með 24 stig í hálfleik og 76ers með 15 stiga forystu, 65-50.

Þeim Joel Embiid og James Harden lenti saman í lok fyrri hálfleiks eftir að Harden var ósáttur með brot miðherjans. Báðir fengu bara tæknivillu og héldu áfram leik.





Kyrie Irving skoraði 26 stig, gaf 10 stoðsendingar og stal átta boltum og Al Horford bætti við 16 stigum og 12 fráköstum þegar Boston Celtics vann 107-99 sigur á Miami Heat. Boston er að braggast og vann þarna sinn fjórða leik í röð.

Þetta var ellefti leikur Kyrie Irving með bæði 20 stig og 10 stoðsendingar og er hann fyrsti Boston-maðurinn til að ná því síðan að Larry Bird gerði það tímabilið 1986-87. Jayson Tatum var með 19 stig fyrir Boston og Marcus Morris skoraði 17 stig.





Giannis Antetokounmpo fór fyrir liði Milwaukee Bucks og var með 31 stig og 15 fráköst í 116-106 sigri á Dallas Mavericks. Eric Bledsoe skorðai 21 stig og Malcolm Brogdon var með 19 stig fyrir Bucks-liðið sem hefur unnið fimm í röð og tólf af síðustu fjórtán.

Nýliðinn Luka Doncic var með þrennu hjá Dallas, 18 stig, 11 fráköst og 10 stoðsendingar, en hitti ekki vel. Hann varð aftur á móti yngsti leikmaðurinn í sögu NBA sem nær þrennu.













Úrslitin í NBA-deildinni í nótt:

Los Angeles Lakers - Golden State Warriors    111-130    

Utah Jazz - Portland Trail Blazers    104-109    

Philadelphia 76ers - Houston Rockets    121-93    

Boston Celtics - Miami Heat    107-99    

Memphis Grizzlies - New Orleans Pelicans    85-105    

Brooklyn Nets - Sacramento Kings    123-94    

Atlanta Hawks - Orlando Magic    103-122    

Milwaukee Bucks - Dallas Mavericks    116-106    

Washington Wizards - Detroit Pistons    101-87    

Cleveland Cavaliers - Chicago Bulls    88-104    

New York Knicks - Oklahoma City Thunder    109-127   

NBA

Mest lesið


Fleiri fréttir

Sjá meira


×

Mest lesið