Hættiði að skattpína þjóðina!

Fyrirgefiði en ég er með velgju þessa dagana af því að hlusta á ASÍ og fleiri „valdhafa“ í þjóðfélaginu ræða kjaramál þjóðarinnar. Enn er verið að tala um að hækka skatta á þeim sem eru að þéna eitthvað almennilega og enn á að þröngva lélegum kjörum yfir alla línuna með flókinni og hærri skattlagningu. Þessi umræða um að jafna kjör almennings á kostnað þeirra sem eru með góð laun er fáránleg umræða í landinu okkar. Fariði nú út úr moldarkofa hugans gott fólk! Losiði ykkur við þessa hugarfjötra fátæktar, að allir eigi að hafa það jafnskítt. Losiði um þessi höft og leyfum öllum sem nenna að vinna í þessu landi okkar, að þéna hressilega! Það myndi gera miklu meira fyrir þjóðarbúið okkar. Ekki refsa fólki með hærri sköttum. Reyniði frekar að hvetja almenning til að vinna með sanngjörnum sköttum á alla línuna. Þá gætu opnast dyr fyrir meiri velmegun í landinu okkar. Hættiði að þvinga fram eitthvað sem heftir alla framþróun en það gera hærri skattar. Það fjölgar líka bara skattsvikum í landinu. Fólki á að líða vel með þá skatta sem það borgar af launum sínum og vera sátt við það. Skattar mega ekki vera svo háir að efnað fólk eða fólk sem nennir að vinna, leiti allra leiða til þess að komast hjá skattpíningunni. Leyfum almenningi að vinna eins mikið og það vill án þess að missa stóran part af fúlgunni beint í skatta, því þá vill engin að leggja það á sig að vinna meira. Og þá græðir ríkiskassinn í raun miklu minna. Það má ekki gleyma því að stundum þarf fólk að taka vinnutarnir, til dæmis ef það langar að eignast þak yfir höfuðið. Opniði fyrir þá hugsun ráðamenn. Þetta eru ekki allt fyrrum bankaræningjar!

Leyfum launafrelsi í landinu

Fariði nú að horfa til Noregs, gamla lands forfeðra okkar Íslendinga. Lærið af þeim. Sjáiði hvernig skattkerfi þeirra er uppbyggt og hvernig þegnar þar eru skattlagðir. Ein skattaprósenta yfir alla línuna. Þar ræður sanngirnin ríkjum. Þar má fólk verða mjög mjög ríkt áður en yfirvöld leggja á það hærri skatt. Þar eru ekki einhverjar aumar 800 þúsund krónur á mánuði sem kveikja á hátekjuskatti, sem er sú upphæð sem varla dugir fyrir heimilishaldi fjögurra manna fjölskyldu á Íslandi. Ef þið þurfið endilega að hafa hátekjuskatt, hafiði þá hátekjuskatt sem miðar við þrjár fjórar milljónir á mánuði. Hvenær ætlar fólkið í brúnni að byrja að umbera fólk með góðar tekjur og líka ríkt fólk? Þurfum við öll að hafa það skítt? Það vantar meira frelsi í þessa launaumræðu og umburðarlyndi gagnvart þeim sem hafa há og góð laun. Við ættum öll að geta þénað vel ef við nennum að vinna eða nennum að mennta okkur. Við skulum ekki gleyma því að á bakvið háar tekjur sumra er margra ára háskólanám. Er það sanngjarnt td. að læknanemi sem er búinn að vera án tekna í mörg mörg ár vegna náms sé svo skattpíndur loksins þegar hann kemur út á vinnumarkaðinn? Í alvöru, finnst þér það sanngjarnt? Má læknirinn ekki bara þéna vel? Hvað er málið? Afhverju þurfa íslensk yfirvöld að hefta almennilega launaþróun með skattpíningu?

Lausnin gæti verið svona

Æ greyin mín fariði að hugsa þetta upp á nýtt! Hvers vegna þarf að flækja málin svona? Er það sanngjarnt að fólk með háar tekjur borgi hærra prósentuhlutfall en aðrir? Í alvörunni? Sjá það ekki allir að fólk með háar tekjur borgar meira í ríkiskassann hvort eð er. Afhverju þarf að flækja skattinnheimtu eina ferðina enn á Íslandi? Ég sem var að vona að bráðum sæju yfirvöld að sér og einfölduðu skattálagningu þjóðarinnar í eitt þrep. Ég er komin með lausnina. Sko. Höfum þetta einfalt; Ein skattprósenta á alla línuna segjum td. 35% en skattleggjum ekki fólk með tekjur undir 350.000 krónur á mánuði sem væru þá skattleysismörk. Það finnst mér sanngjarnt. Hættið svo að skattpína þjóðina! Leyfið fólki að þéna almennilega ef það getur unnið meira og langar það eða þarf þess tímabundið. Frelsi er undirstaða þróunar. Hættið þessum höftum! Losið þjóðina úr þessum fjötrum. Þegar fólk er skattpínt þá fer það bara að svíkja undan skatti og vera óheiðarlegt. Ekki skilar það sér í þjóðarbúið og ekki viljum við hafa skattalöggur úti um allt. Treystið fólki til þess að vera heiðarlegt og skattleggið tekjur þess með sanngjörnum hætti. Og í guðanna bænum látið sparifé þjóðarinnar vera í friði!