Háværir ökufantar gera íbúum Akureyrar lífið leitt

Þorvaldur Bjarni Þorvaldsson tónlistarmaður er búinn að fá nóg. Hann tjáir gremju sína á Facebook og biðlar til lögreglunnar á Akureyri.

„Það er þekkt hér í bæ að örfáar mannvitsbrekkur hafa ánægju af því að þenja hljóðkútslausar druslur á nóttunni þegar börn sem þurfa hvíld til þess að vaxa og dafna eiga rétt á því að geta sofið,“ segir Þorvaldur.

Erlendir gestir með bauga undir augum

Bíladagar verða haldnir á Akureyri nú um helgina og víst er að það fellur misvel í kramið. Veisla hjá bílaáhugafólki en öðrum er ekki skemmt. Tónlistarmaðurinn segist sjálfur oftast vinna fram eftir og taki því eftir því og geti borið vitni um að þetta sé stöðug í gangi.

„Þetta er til skammar og verður ekki til þess að ferðamenn beri bænum góða söguna. Ég er oft með erlenda gesti sem ég hitti á morgnana með bauguð augu sem minna á stór spurningamerki eftir þessar kyrru sumarnætur á Akureyri.“

 

Erfitt að standa þessa gaura að verki

Vísir ræddi við Sigurð Sigurðsson aðalvarðstjóra á Akureyri og hann segir þetta laukrétt hjá Þorvaldi Bjarna, lögreglunni hefur borist kvartanir og svo fari þetta ekki fram hjá þeim sjálfum. Stillt veður hefur verið í þessum höfuðstað Norðurlands og því hljóðbært. Hávaðinn fari ekkert á milli mála. En það er ekki gott við að eiga.

„Það er ekki gott að ná í þessa ökumenn. Erfitt er að standa þá að verki þessa gaura. En, við reynum, þvælumst hér um allan bæ en það er ýmsu öðru að sinna. En, já, það er rétt. Það er ónæði út af þessu.“

Sigurður bendir á að auðvelt sé að spóla með tilheyrandi hávaða og látum í nokkrar sekúndur og komast upp með það því erfitt getur reynst að standa menn að verki.

„Við höfum reynt ýmislegt. En, erum ekki með óteljandi fjölda af mannskap til að eltast við menn. Bílaklúbburinn hefur líka verið að reyna að koma skikki á þetta. Ef það hafa verið einhverjir sem eiga að keppa sem eru með einhverja stæla niður í bæ.“

Þannig að, flest bendir til þess að fólk verði að lifa við þetta. Trúlega verður aldrei friður meðan á bíladögum á Akureyri stendur.

„En, ég skil vel gremju manna ef þeir geta ekki sofið. Skil að menn séu ekki hrifnir af því en við náum þeim aldrei alveg, að þagga niður í öllu bílabrölti þessa helgi. En, við berjumst.“

Á vef Akureyrarbæjar er fjallað um Bíladaga og siðareglur hátíðarinnar, sem sjá má að neðan.

• Við göngum (keyrum) vel um bæinn okkar, jafnt gestir sem heimamenn
• Virðum hámarkshraða í íbúðarhverfum sem og á vegum úti
• Við spólum einungis á akstursíþróttasvæði Bílaklúbbs Akureyrar
• Gestir Bíladaga eru jákvæðir og þar af leiðandi þrælskemmtilegir
• Við berum virðingu fyrir náunganum og tökum höndum saman um að gera Bíladaga frábæra
• Gestir Bíladaga ganga snyrtilega um umhverfi sitt