Þrettán milljónir í bíl og bílstjóra borgarstjóra

Heildarkostnaður vegna reksturs bíls og vegna launa bílstjóra borgarstjóra síðastliðið ár var þrettán milljónir króna. Þetta kemur fram í svari við fyrirspurn Kolbrúnar Baldursdóttur sem vildi vita hver kostnaður væri við akstur með borgarstjóra, hver væri kostnaður boðsendinga og póstsendinga innan og utan kerfis, hver væri kostnaður vegna Barnaverndar Reykjavíkur og loks kostnaður við önnur verkefni svo sem innkaupum og öðrum sendiferðum. 

Skrifstofa borgarstjóra aflaði gagna vegna fyrirspurnar Kolbrúnar en framkvæmt var tímabundið verkbókhald á starfi bílstjóra borgarstjóra á haustmánuðum 2018. Kom þar í ljós að akstur fyrir borgarstjóra á þessum tíma væri 36 prósent af heildar vinnuframlagi bílstjóra. Daglegar póstsendingar, sem fela meðal annars í sér þjónustu við Barnavernd, þjónustumiðstöðvar borgarinnar og þjónustuverið á Höfðatorgi, voru 22 prósent af vinnuframlaginu.

Innkaup, sendiferðir og tilfallandi boðsendingar fyrir skrifstofur miðlægrar stjórnsýslu voru 12 prósent. Önnur verkefni bílstjóra eru 30 prósent af heildarvinnuframlaginu og þar ber helst að nefna vinnu við fundi borgarstjórnar.

Taldi borgarstjóra geta gengið eða hjólað

Á fundi borgarráðs í gær benti Kolbrún á að nú liggi aksturshluti borgarstjóra fyrir. Það séu einhverjar milljónir sem betur mætti nota í annað skynsamlegra að mati hennar. Sagði hún það vera sitt mat að góður bragur yrðir að því að borgarstjóri legði það af með öllu að aka um með einkabílstjóra.

„Hann, eins og aðrir borgarbúar, getur farið sinnar leiðar með öðrum leiðum, með því að ganga, hjóla, aka um í sínum einkabíl eða taka strætó,“ sagði Kolbrún í bókun sinni.

Starfsmenn fái frið fyrir ágangi pólitíkusa

Borgarráðsfulltrúar Samfylkingarinnar, Viðreisnar, Pírata og Vinstri grænna sögðu þetta í fjóra sinn á þessu kjörtímabili, sem er nýhafið, að málefni bílstjóra séu í fundargerð borgarráðs. Bent var á að Dagur B. Eggertsson borgarstjóri væri með bílstjóra líkt og allir forverar hans í starfi. Munurinn nú sé sá að starfsskyldur bílstjóra séu að stórum hluta önnur verkefni. Áður fyrr voru tveir bílstjórar í fullu starfi á þremur bílum og þá hafði forseti borgarstjórnar einnig sérstakan bílstjóra en svo sé ekki lengur.

„Það væri óskandi ef einstaka starfsfólk Ráðhússins fengi nú frið fyrir ágangi stjórnmálamanna sem í fullkominni málefnafátækt einbeita sér að málum sem eingöngu virðast til þess fallin að gera öll útgjöld borgarinnar tortryggileg.“

Kolbrún Baldursdóttir hefur áður gert það að tillögu sinni að borgarfulltrúar sem og starfsfólk Ráðhúss borgarinnar fái frí bílastæði í borginni. 

Lagði Kolbrún það til að þetta yrði fjármagnað með því að leggja af þann sið að borgarstjóri hafi bílstjóra.