Hefja neyðarsöfnun fyrir börn sem búa á einum versta stað í heimi

UNICEF á Íslandi hóf í dag neyðarsöfnun fyrir börn í Jemen. Eftir margra ára átök ríkir nú gríðarleg neyð í landinu en ríkið er eitt það fátækasta í heimi.

Nú er svo komið að Jemen er einn versti staður í heimi til að vera barn og þarfnast nánast hvert einasta barn í landinu neyðaraðstoðar, að því er fram kemur í tilkynningu UNICEF.

Yfirskrift neyðarátaksins er „Má ég segja þér soldið?“ sem vísar í algengt talmál barna. Samhliða neyðarsöfnuninni gefur UNICEF á Íslandi út myndband þar sem heyra má sögur barna í Jemen sem eru helstu fórnarlömb átakanna í landinu. Myndbandið má sjá neðst í fréttinni.

Hægt er að styðja söfnunina með því að senda sms-ið JEMEN í númerið 1900 og gefa þannig 1900  krónur eða leggja inn frjálst framlag. Fyrir 1900 krónur er til að mynda hægt að veita barni rúmlega tveggja vikna meðferð við vannæringu.