Humarþjófnaður upplýstur í Reykjanesbæ

Lögreglan á Suðurnesjum hefur upplýst mál er varðar þjófnað á miklu magni af humri frá Humarsölunni í Reykjanesbæ. Tveir menn hafa verið handteknir í tengslum við rannsókn málsins og játuðu þeir að hafa brotist inn í frystigám aftan við húsnæði Humarsölunnar. Þetta kemur fram í tilkynningu frá lögreglunni á Suðurnesjum.

Ljóst er að a.m.k. annar mannanna hafði selt eitthvert magn áður en lögregla hafði hendur í hári þeirra.

Talið er að um 350 kíló af humri hafi horfið úr gámnum en lögregla hefur ekki endurheimt nema hluta þýfisins. Rannsókn málsins er á lokastigi.

Lögregla beinir þeim tilmælum til fólks að kaupa ekki humar sem grunur gæti legið á að væri illa fenginn.