Tugir slösuðust í mótmælunum í Katalóníu

Talið er að að minnsta kosti 89 manns hafi slasast í fjölmennum mótmælum í Katalóníu á Spáni í gær þar sem þúsundir mótmæltu því að Carles Puigdemont, fyrrverandi forseti heimastjórnar héraðsins, hefði verið handtekinn í Þýskalandi. Mótmælendurnir slösuðust í átökum við lögreglu og þá voru fjórir handteknir.

Puigdemont, sem meðal annars er ákærður á Spáni fyrir landráð, var handtekinn í Þýskalandi á grundvelli evrópskrar handtökuskipunar sem gefin var út á hendur honum á föstudag.

Hann var handtekinn á leið sinni frá Danmörku til Belgíu en þar hefur hann verið í sjálfskipaðri útlegð síðan í október eftir að ríkisstjórn Spánar vék honum úr starfi. Það var gert eftir þjóðaratkvæðagreiðslu í Katalóníu sem ríkisstjórn Spánar segir hafa verið ólöglega. Héraðsstjórn Katalóníu var leyst upp og Madríd tók yfir stjórn héraðsins.

Puigdemont mun koma fyrir dómara í Þýskalandi síðar í dag. Hann á yfir höfði sér allt að 30 ára fangelsisvist fyrir þau meintu brot sem hann er ákærður fyrir á Spáni. Níu aðrir leiðtogar sjálfstæðissina Katalóníu sitja í fangelsi. Fimm aðrir eru í útlegð. Á föstudaginn úrskurðaði Hæstiréttur Spánar að ákæra ætti 25 leiðtoga héraðsins fyrir landráð, fjárdrátt og að hlýða ekki skipunum ríkisins.