Krefst fimm ára fangelsis yfir Sindra Þór

Embætti lögreglustjórans á Suðurnesjum vill Sindra Þór Stefánsson í fimm ára fangelsi fyrir innbrot í gagnaver í desember og janúar síðastliðnum. Það hvernig Sindri Þór kom fram á að verða honum til refsiþyngingar að mati Öldu Hrannar Jóhannsdóttur saksóknara sem sækir málið fyrir hönd embættisins. Málflutningur í málinu fer fram í Héraðsdómi Reykjaness í dag.

Alda Hrönn sagði Sindra ekki hafa gert neitt til að aðstoða lögreglu við rannsókn málsins. Hann hafi reynt að villa um fyrir lögreglu, reynt að hylja slóð sína og hafi verið lögð gífurleg vinna í að reyna að finna tölvubúnaðinn sem stolið var úr gagnaverunum án árangurs.

Alda Hrönn sagði að gögn málsins sýndu með engum hætti aðild huldumanna að máli, sama hvert væri litið. Mennirnir væru sekir um þá háttsemi sem þeim er gefið að sök og þar hafi hlutur Sindra Þórs verið stærstur við framkvæmd, skipulagningu og undirbúnings innbrotanna.

Ekki veitt neina aðstoð

Sindri hefur viðurkennt að hafa farið inn í tvö gagnaver en ekki að hafa skipulagt og undirbúið innbrotin. Alda Hrönn sagði Sindra ekki hafa gert neitt til að upplýsa hvar tölvubúnaðinn væri að finna. Ljóst sé að tjón fyrirtækjanna hleypur á annað hundrað milljónum króna.

Glæpurinn hefði skaðað orðspor Íslands sem gagnaversstað og huga bæri að því við ákvörðun refsingar að setja þyrfti skýrt fordæmi til að sýna fram á að menn kæmust ekki auðveldlega frá slíkum brotum. Allt þetta ætti að koma Sindra til refsiþyngingar.

Alda Hrönn Jóhannsdóttir fór fram á að Matthías Jón Karlsson yrði dæmdur til þriggja ára fangelsis óskilorðsbundið og sömu sjónarmið ættu við þegar dómari legði mat á hvort til refsiþyngingar komi.

Sex mánaða til fimm ára fangelsi

Saksóknari fór fram á að Pétur Stanislav Karlsson yrði dæmdur til að minnsta kosti tveggja ára óskilorðsbundinnar fangelsisvstar, Viktor Ingi Jónasson til tveggja ára óskilorðsbundinnar fangelsisvistar og Hafþór Loga Hlynsson til þriggja ára óskilorðsbundinnar fangelsisrefsingar.

Fór Alda Hrönn fram á að Ívar Gylfason yrði dæmdur til tveggja ára óskilorðsbundinnar refsingar og Kartan Sveinarsson yrði dæmdur til sex mánaða fangelsis. 

Alda Hrönn lagði það í mat dómara hvort að skilorðsbinda bæri þá refsingu eða ekki.

Skýrt mynstur

Sindri Þór og bræðurnir Matthías Jón og Pétur Stanislav Karlssynir eru sakaðir um stórfelldan þjófnað með því að hafa lagt á ráðin, undirbúið, skipulagt og framkvæmt innbrot og þjófnað í gagnaverum Algrim Consulting og BDC Mining á rúmum tólf klukkutímum frá 20:20 þann 5. desember 2017 og til klukkan 09 morguninn eftir 6. desember. Gagnaverin eru rekin að Heiðartröð 555 og Heiðartröð 554 á Ásbrú í Reykjanesbæ. Allir neita sök er varða þennan ákærulið.

Sömu menn eru ákærðir fyrir tilraun til stórfellds þjófnaðar þegar þeir ætluðu að brjótast inn í gagnaver BDC Mining að Heiðartröð 557 á tímabilinu 5. desember 2017 til 10. desember 2017. Þeim tókst hins vegar ekki ætlunarverk sitt. Allir neita sök.

Sindri Þór, Matthías Jón og Viktor Ingi Jónasson eru ákærðir fyrir stórfelldan þjófnað fyrir að hafa brotist inn í gagnaver AVK í iðnaðarhverfi í Borgarnesi þann 15. desember 2017. Sindri Þór hefur sem áður segir játað að hafa brotist inn í gagnaverið en neitar að hafa skipulagt, undirbúið eða lagt á ráðin um það. Hinir tveir, Matthías og Viktor, neita sök.

Flúðu þegar þjófavarnarkerfið fór í gang

Sömu menn eru ákærðir fyrir tilraun til þjófnaðar með því að hafa skipulagt innbrot og þjófnað í BDC Mining að Heiðartröð 555 til 557 að Ásbrú aðfaranótt annars dags jóla í fyrra. Er einn þeirra sagður hafa farið inn í húsið en þeir hurfu á brott þegar þjófavarnarkerfið fór í gang. Allir neita sök.

Sindri Þór, Matthías Jón og Pétur Stanislav eru ákærðir fyrir að hafa í samvinnu við Viktor Inga, Hafþór Loga Hlynsson og Ívar Gylfason, undirbúið, lagt á ráðin, skipulagt innbrot og þjófnað í gagnaver Advania að Sjónarhóli á Ásbrú í Reykjanesbæ á milli klukkan 03 og 05 aðfaranótt 16. janúar síðastliðinn. Sindri Þór og Matthías hafa játað að hafa farið inn í gagnaverið og haft þaðan í burtu tölvubúnað en neita að hafa skipulagt, undirbúið og lagt ráðin um innbrotið. Hinir neita alfarið sök.

Kjartan Sveinarsson er ákærður fyrir að hafa komið á samskiptum á milli Hafþórs Loga og Matthíasar Jóns við Ívar Gylfason sem var öryggisvörður hjá Öryggismiðstöð Íslands og sakaður um að hafa veitt innbrotsþjófum lykilupplýsingar til að geta brotist inn í gagnaver Advania í janúar síðastliðnum.

Alda Hrönn sagði við munnlegan málflutning í morgun að hlutur sakborninga í Bitcoin-málinu hefði verið órjúfanlegur til að fullkomna innbrotin í gangaverin. Alda Hrönn sagði skýrt mynstur í hegðun sakborninga sem sýndi fram á að þeir hefðu komið að framkvæmd, skipulagningu og undirbúningi innbrotanna.

Gefa ekki upp hlut annarra

Sagði hún ákærðu hafa gert lítið sem ekkert til að aðstoða lögreglu við rannsókna málsins. Þeir hafi sumir hverjir eitt samfélagsmiðlum sínum þegar lögregla gerði símtæki þeirra upptæk og hafi reynt að hylja slóð sína ítrekað með því að forðast eftirlitsmyndavélar, eitt samskiptum, notast við burner-símanúmer, hulið bílnúmer og eytt sendiferðabifreið sem er talin hafa verið notuð við innbrotið í Borgarnesi.

Þó tveir af ákærðu, Sindri Þór Stefánsson og Matthías Jón Karlsson, hafi játað sök að hluta þá hafi þeir neitað að gefa upp hlut annarra í málinu og borið ítrekað við minnisleysi.

Sagði Alda Hrönn hlut sakborninga órjúfanlegan og nauðsynlegan. Um hefði verið að ræða verkskipta aðild þar sem hver hafði sitt hlutverk sem öll voru nauðsynleg til að fullkomna brot.

Alda Hrönn sagði að þegar lögregla fékk aðgang að símagögnum Sindra Þórs hefði það verið vendipunktur í rannsókn málsins því þau ein og sér sanni að hennar mati sekt Sindra í málinu.