Jónas frá Hriflu hreinsar til

Davíð Logi Sigurðsson, sagnfræðingur, fjallar í bók sinni Ærumissir, um dramatíska atburði sem urðu í íslenskri pólitík árið 1927. Bókin segir sögu Einars M. Jónassonar, sýslumanns vestur á fjörðum, sem Jónas frá Hriflu vék úr embætti með nokkrum látum. Við vinnslu bókarinnar studdist Davíð meðal annars við heimildir sem ekki höfðu komið fram áður.

„Það má segja að ég hafi átt „Eureka móment“ sitjandi einn þarna inni á skjalasafninu enda draumur hvers sagnfræðings  að komast í bunka af skjölum sem ekki hafa komið fyrir sjónir annarra,“ segir Davíð.

„Það var mjög skemmtilegt að vinna þessa bók. Annarsvegar segja sögu þessa sýslumanns sem lendir í aðgerðum Jónasar og hins vegar að varpa ljósi á hið breiða baksvið pólitíkur þessara ára, sem var nokkuð hörð."

„Þegar Jónas frá Hriflu kemst til valda vill hann hreinsa duglega til. Honum þykir embættismannakerfið fúið og í því að finna allt of marga íhaldsmenn, sem honum er meinilla við. Hreinsunaraðgerðirnar hefjast á sýslumanninum fyrir vestan. Sá neitar að víkja og úr verður mikið mál. Inn í aðgerðir Jónasar blandast síðan ýmsar persónur sem segja má að hafi síðar orðið áhrifamenn í íslensku samfélagi, auk Jónasar sjálfs. Þetta eru menn eins og Stefán Jóhann Stefánsson, ungur lögfræðingur í Reykjavík, sem síðar varð formaður Alþýðuflokksins og bæði forsætis- og utanríkisráðherra og Hermann Jónasson, sem síðar varð forsætisráðherra.“

Spurður hvort spegla megi nútíma pólitík í sögunni og örlögum Einars vill Davíð sem minnst um það segja. „Ekkert er svo sem nýtt undir sólinni og stundum er eins og sagan endurtaki sig. Þar fyrir utan var Jónas frá Hriflu sjálfur afar umdeildur og gegnum tíðina hefur það verið þekktur leikur að benda á líkindi einhverra stjórnmálamanna við hann. En það læt ég aðra um.“

Ærumissir er þriðja bók Davíðs. Áður hafa komið út bækurnar Velkominn til Bagdad og Ljósin á Dettifossi.

Sögur útgáfa gefa Ærumissi út.

Þessi kynning er unnin í samstarfi við Sögur útgáfu.