Innlent

Gunnar Bragi annar í orði en á barborði

Kolbeinn Tumi Daðason skrifar
Gunnar Bragi Sveinsson fór mikinn í kynningu fyrir Rakarastefnuráðstefnu Sameinuðu þjóðanna um jafnrétti kynjanna árið 2015.
Gunnar Bragi Sveinsson fór mikinn í kynningu fyrir Rakarastefnuráðstefnu Sameinuðu þjóðanna um jafnrétti kynjanna árið 2015. Fréttablaðið/GVA
„Við þurfum að breyta staðalímyndunum sem eru til umræðu einmitt inn á rakarastofum eða í búningsherbergi einhvers staðar um konur. Við þurfum að breyta þessum hugsanahætti og þetta er þáttur okkar í því.“



Þetta sagði Gunnar Bragi Sveinsson, þáverandi utanríkisráðherra, í viðtali við fréttastofu Stöðvar 2 í ársbyrjun 2015. 



Fréttina má sjá hér að neðan en ummælin eru athyglisverð í ljósi fregna í kvöld af orðavali Gunnars Braga, núverandi þingmanns Miðflokksins, að sumbli með kollegum sínum úr flokknum og Flokki fólksins á dögunum.

Tilefni viðtalsins árið 2015 var að handan við hornið var tveggja daga rakarastofuráðstefna hjá Sameinuðu þjóðunum á vegum Íslands og Súrinam um jafnréttismál.



Gunnar Bragi flutti erindi á ráðstefnunni sem sjá má hér.

Ummælin eru áhugaverð þegar þau eru sett í samhengi við ýmislegt sem Gunnar Bragi lét falla í samtali við þingmenn Miðflokks og Flokks fólksins á bar á dögunum. DV og Stundin hafa undir höndum upptöku sem barst miðlunum nafnlaust þar sem heyrist tal þingmannanna.



Meðal þess sem fyrrnefndir miðlar hafa eftir Gunnari Braga eru eftirfarandi ummæli:

Oddný Harðardóttir segir í samtali við fréttastofu að ummæli Gunnars Braga dæmi sig sjálf.
Um Oddnýju Harðardóttur, þingmann Samfylkingarinnar:



„Oddný er ekkert ágæt. Hún er algjör apaköttur. Hún veit ekki neitt, kann ekki neitt, getur ekki neitt.“



Um unga ónafngreinda stjórnmálakonu úr Sjálfstæðisflokknum:



„Ég held reyndar að [...] geti verið helvíti öflug. Hún er helvíti sæt stelpa.“



Í samtali þar sem Anna Kolbrún Árnadóttir, þingmaður Miðflokksins, segir að strákar séu upp til hópa lesblindir en stelpur talnablindar.



„Er það þess vegna sem þær vita ekki hjá hvað mörgum þeir sofa hjá,“ svaraði Gunnar Bragi.



Þá á hann að hafa kallað Unni Brá Konráðsdóttur, fyrrverandi þingmann Sjálfstæðisflokksins „kræfa kerfiskerlingu“.

Andrés Ingi Jónsson, þingmaður VG.
Gunnar Bragi hefur ekki svarað símtölum fréttastofu í kvöld. Flokksfélagi hans og formaður Miðflokksins, Sigmundur Davíð Gunnlaugsson, segir alvarlegt ef leynileg hljóðupptaka hafi verið gerð af persónulegu samtali þingmanna.



„Hópurinn sem vísað er til sat einn úti í horni og því ekki um annað að ræða en að brotist hafi verið inn í síma einhvers þeirra sem þarna voru staddir eða beitt hlerunarbúnaði.“



Andrés Ingi Jónsson, þingmaður Vinstri grænna, tjáir sig um ólík orð Gunnars Braga á ólíkum tímum í færslu á Twitter. Þar rifjar hann upp ræðu Gunnars Braga undir liðnum Efling trausts á stjórnmálum og stjórnsýslu þann 20. september.



„Ég held að hvert og eitt okkar þurfi að horfa inn á við og velta því fyrir sér að við getum hugsanlega borið ábyrgð á því að traustið hefur minnkað. Reglur laga ekki það hvernig við tölum hvert um annað, hvernig við tölum um Alþingi eða hvernig við komum fram hér. 



Það eru engar reglur sem munu koma í veg fyrir að menn láti út úr sér alls konar þvælu sem engin rök geta stutt. Það er vitanlega best að vera bara hreinskiptinn og heiðarlegur, segja satt, vera sannsögull, standa við loforðin og tala ekki hvert annað niður. 



Ég held að það sé það sem mestu skiptir,“ sagði Gunnar Bragi.



Aðspurður um ólík orð Gunnars Braga á ólíkum tíma segir Andrés:



„Dagamunur á stráknum.“

Tengd skjöl


Tengdar fréttir

Telur að brotist hafi verið inn í síma eða hlerunarbúnaði beitt

Sigmundur Davíð Gunnlaugsson, formaður Miðflokksins, segir brotist hafi verið inn í síma einhvers þeirra þingmanna Miðflokksins og Flokks fólksins sem sátu á hótelbar í miðborg Reykjavíkur þann 20. nóvember, eða hlerunarbúnaði beitt.

Bergþór biðst afsökunar

Bergþór Ólason, þingmaður Miðflokksins, segir að svo virðist sem hann hafi notað orðfæri honum framandi á hótelbar í liðinni viku.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.